'Ziaboga' arraunaren gaineko dokumentala aurkeztuko dute Niessenen
Kantauri itsasoari egindako begirada da dokumentala, baina bereziki, 1940ko hamarkadatik gaur egun arteko bidaia egingo du arraun munduan barrena.
Ziaboga Kantauri itsasoko traineruei buruzko dokumentala aurkeztuko dute Niessen Kulturgunean astelehenean, hilak 30. Urriaren 29an ematekoak ziren, baina COVID-19aren pandemiagatik hartutako neurrien ondorioz bertan behera utzi zuten emanaldia. Dokumentalaren zuzendaria Iñaki Pinedo eta dokumentazio arduraduna, Historian doktorea eta Deustuko Arraun Taldeko arraunlaria den Angel Obregonek solasaldian izango dira proiekzioaren ondoren.
Kantauri itsasoari egindako begirada da dokumentala, baina bereziki, 1940ko hamarkadatik gaur egun arteko bidaia egingo du arraun munduan barrena. Hiru urteko lana du oinarri dokumentalak, eta artxiboko material ugari erabili dute osatzeko. Arraunaren munduaren parte diren gizon eta emakumeen testigantza ugari bildu dituzte dokumentalera: Antonio Oliden, Jose Luis Korta, Jon Salsamendi, Andrea Oubiña, Oihan Gozategi edo Jxemi Elduaien. Donostiari eta Kontxako Banderari ere eskaini diete tartea.
Soinu banda osatzeko Gipuzkoako musikariengana jo dute: Gorka Hermosa, Aitor Furundarena, eta Tadusak taldeak hartu dute parte.
Kirola islatu du dokumentalak, baina harago jo du, Kantauri itsasoko traineruen historiaren giza eta kultura alderdietan sakonduz. Belaunaldi berriak eta emakumeak ere tartea dute. Hibaikaren sorreraz, emakume eta gizonen traineruaz, baina arraun elkartea sortu aurretik Errenteria-Oreretan izan ziren beste esperientziak ere bildu dituzte dokumentalera; Errenteria Kontxan izan zen 1953, 1954, 1967 eta 1968an. 1972a eta 1974a artean, Beraun Arraun Eklkartea aritu zen herria ordezkatzen arraun munduan; azkenik, 1987an sortu zen Hibaika Arraun Elkartea.
Gonbidapenak Bibe aplikazioaren bidez eskuratu behar dira eta 18:55 arte gordeko zaie lekua haien jabeei; hortik aurrera sarrera librea izango da erabilgarri dauden aulkiak bete arte.
Filmaren proiekzioa gazteleraz izango da; hitzordua, astelehenean 19:00etan Niessen Kulturgunean.