[Galeria] Merkataritza txikiaren babesean egin diote aurka Amazoni
Oiartzunen lur hartuko duen multinazionalak herria "basamortu" bihur ez dezan bildu dira gaur goizean, bertako merkatarien babesean.
'Amazon ez hemen ez inon!' lelopean bildu dira Lanbarren eremuko biribilgunean. 
Orain arte San Jose Lopez garraio eta logistika enpresarenak izan diren azpiegiturak erosi dituen funtsak eremua Amazoni alokatu nahi diola jakin ahal izan dute Oiartzungo bizilagunek. Horren kontra bildu dira gaur goizean ‘Amazon ez hemen ez inon!’ lelopean, Lanbarren eremuko sarreran dagoen biribilgunean.
Beratutakoek Amazon bezalako multinazionalek komertzio txikian eta klima aldaketan sor ditzaketen kalteak gaitzetsi dituzte. Liburuak saltzen hasi zen enpresak esparru guztiak monopolizatu dituela salatu dute, bertako dendari txikiak “gosez hilaz”.
Merkataritza txikiak herriak berpizten dituela uste dute, eta Amazon bezalako erraldoiek hiriak husten dituztela, txikienak desagerraraziz eta auzoak basamortu bilakatuz.
Enpresa horiek langileak esplotatzen dituztela salatu dute, produktuak merkatu ahal izateko: “Eredu kapitalista horrek ez du lurralderik ez euskarririk, baina aldi berean gure lurraldeei esker egiten dute negozioa”. Gipuzkoarrek salerosketa horiei zentimorik emango ez dietela aldarrikatu dute.
Euskaldendak-Dendartean merkataritza elkartearen ordezkari den Bittor Lirrizabarrek hartu du hitza bizilagunen elkartasunari hel eginez: “Herritarrak elkartzen bagara agintariak beldurtzen dira”, horiek baitira azken hitza dutenak: “Dena birtuala da, baina azkenean lurra hartu behar dute, fisikoki banatu egin behar dituzte produktuak, eta gure etxeetara bideratzen dituzte, beraz, ez da dena birtuala”.
