[Galeria] "Guztion ostalaritzaren" SOS deia, inoiz baino ozenago
Instituzioei erreskate plana eskatu eta bihotzez eskerrak eman dizkiete elkartasuna adierazi dieten bizilagunei: "Behar zaituztegu".
Gaur arratsaldean ordubetez gelditu da mundua, ostalarien aldarriak aditzeko; literalki, zirkulazioa etenda egon da tarte luze batez, hainbeste izan baitira gaur arratsaldeko elkarretaratzearekin bat egin dutenak, non Errenteria-Orereta osoa aldez alde hartu duten, Zumarditik abiatuz eta plazan bertan amaituz: ilaran lehenek bira amaitzen zutenean, azkenak oraindik irteten ari ziren hasiera puntutik.
Norbanakoek ireki dute bidea, ostalarien egoera latzari konponbidea emateko eskaerak oihukatuz. Hornitzaileek jarraitu diete, euren banaketa ibilgailuen barrutik argiak eta klaxonak dardaraziz.
Itzuleraren amaieran Zumardian manifestu bat irakurri dute politikariei irtenbideak exijituz: “Dagoeneko ez dugu laguntzarik eskatzen, sektore osorako erreskate-plan bat eskatzen dugu. Presazkoa. Orain”. Honakoak behar dituzte:
- Sektorearentzako laguntzak, ez bakarrik epe laburrekoak, epe ertainekoak eta luzekoak ere.
- ABEE-ak %100ean ematea langile guztiei.
- Establezimenduen hipoteka eta alokairuetarako plana.
- Presio fiskala murriztea udal tasetan.
- Zerga eta tasen ordainketatik salbuestea, fakturazioaren beherapenaren proportzioan, bai eta itxiera osoko epeen salbuespen osoa ere.
- ABEE egoeran dauden langileei ordainketak garaiz egingo direla bermatzea, eta hauek onartzeko izapideak arintzea.
- BEZaren aldi baterako murrizketa.
Ez dute diskurtsoa amaitu nahi izan bertaratutakoei esker ona adierazi gabe, bederatzi hilabete hauetan erakutsitako elkartasunagatik: “Baina, unerik latzenetatik ere alde positiboak ateratzen dira, eta gu, sektore honetako partaide garen guztiok, harro eta eskertuta gaude garai luze honetan jaso ditugun maitasun eta kezka adierazpenengatik. Milioika izan dira!”.
COVID-19ak mezu argi bat utzi du ostalaritzan: “Pandemia horrek zerbait irakatsi badigu, ostalaritza guztiona dela da. Gure bizitzeko eta harremanak izateko eraren parte dela. […] Horregatik, mesedez eskatzen dizuegu, jarrai dezazuela gu babesten. Behar zaituztegu”.
