Herriko establezimenduetan gutxienez hamar euro gastatu, eta aurreztu
Herriko etxebizitza guztietara bidaliko ditu erosketa bonuak udalak, posta arrunt bidez. 18-35 adin tartekoek, lau bonu estra izango dituzte.
Iztietako Diputazio plazan aurkeztu dute kanpaina. COVID-19aren ondorio ekonomikoei aurre egiteko Bizi Errenteria txoke planaren barruan, Erosketa Bonuen bigarren kanpaina abian izango da abendu hasieratik 2021eko urtarrilaren 31ra arte. Kanpaina horren barruan, herriko etxebizitza guztietara erosketa bonuak bideratuko dira, herriko establezimenduetan erabil daitezen (dendak, zerbitzuak, ostalaritza guneak…). Bonuak, Bizi Errenteria programarekin bat egin duten merkataritza, zerbitzu, ostalaritza, jatetxeetan erabil daitezke, baita zuzenean publikoari saltzeko baimena edo parekoa duten nekazaritzako erregimen bereziko saltokietan ere.
Bonuen erakargarritasuna, honakoa: herrian ondasunak edo zerbitzuak erosterakoan, erosketa hori gutxienez 10 eurokoa bada, bost euro aurrez daitezke bonu horietako bat erabiliz. Adibidez: zapata denda batera joan, eta 20 euroko erosketa egiten bada, bonua erabili eta 15 euro pagatu beharko ditu herritarrak. Adi: bonuak bateratzeko aukera dago. Baina aplikatutako hobariak ezingo du gastu osoaren %50 gainditu. Adibidez: zapata denda batera joan, eta 20 euroko erosketa egiten bada, ezingo dira hiru bonu (15 euroko hobaria litzateke) erabili, gastu osoaren %50 gainditzen duelako hobariak.
Herriko etxebizitza bakoitzera bidaliko ditu udalak bonuak posta arrunt bidez. Lau txartel, bizikidetza unitatearentzat izango dira. Eta beste lau, etxe bakoitzean bizi diren 18-35 adin tarteko gazteentzat (2002 eta 1985 urteen artean jaiotakoak, biak barne). “Gazteei bonu estrak bidaltzearen arrazoia da eurak direla online erosteko joera handiena dutenak eta, horregatik, bereziki eragin nahi da haiengan herrian eros dezaten”, zehaztu du udalak.
Aurrezte bonuen bigarren kanpaina honetarako 461.620 euro bideratu ditu udalak. Gaur eman dituzte xehetasunak, Iztietako Diputazio plazan egindako agerraldian. Bertan izan dira udalean ordezkaritza duten alderdi politiko guztietako kideak, baita herriko merkatari eta ostalariak ere.
Saltokiak
Bonuen lehen kanpainan herriko 235 establezimenduk eman zuten izena. Horiek mantendu eta handitu nahi ditu udalak. Horretarako nahikoa da formulario bat betetzea. Klik egin hemen eta hara joateko aukera dago. Lehen kanpainan parte hartu zutenek ez dute bete behar berriro formularioa.
Oraingoz egitasmoaren zati diren establezimenduen zerrenda Bizi Errenteriaren webgunean ikus daiteke. Ziur zerrenda hori handitzen joango dela. Inork zalantzari balu, telefono zenbaki hauetara dei dezake xehetasun eske: 010 (Errenteriatik) edo 943 44 96 00.
