Lezoko gobernu taldeak hark aurkeztutako aurrekontuak onartu ditu
COVID-19aren eraginari aurre egiteko bi ereduren arteko eztabaida izan zen osteguneako udalbatzarrean. Bost mozio onartu ziren.
Ostegunean egin zuten 2021eko udal aurrekontuak eztabaidatzeko udalbatzarra Lezon. Gobernu taldeak mahaiaren gainean bere proposamena jarri zuen, eta onartu. EH Bilduk hemezortzi emendakin aurkeztu arren, ez zen bat bera ere onartu. Beraz, EAJren eta PSE-EEren zazpi zinegotzien aldeko botoarekin, eta EH Bilduren kontrakoekin (sei zinegotzi), udal gobernuak landutako aurrekontu proposamena atera zen aurrera. Hori horrela, 8,8 milioi euroko aurrekontua izango du udalak 2021ean, 2020an baino 40.000 euro txikiagoa.
Bi eredu kontrajarri azaldu ziren udalbatzarrean, COVID-19aren krisia erdigunean jarrita.
Udal gobernuak, koronabirusak eragindako kalteei aurre egiteko laguntzak “momentuko beharren arabera” indarrean jarriko direla jasota du aurrekontuen agirian, “pandemiaren bilakaeraren araberakoak” izango dira neurriak, neurri zehatzik aipatu gabe. Laguntza horiek kreditu globalaren eta gerakinen bidez finantzatuko dira. Lankidetza eskatu zuen gobernu taldeak “sor daitezkeen beharrei erantzuteko”. Udal diru laguntzei aldundiarenak eta Jaurlaritzarenak batuko zaizkiela zehaztu zuten gobernukideek.
EH Bilduk neurri zehatzak plazaratu zituen plenoan. Koalizioaren ustez, onartutako aurrekontuek “COVID-19aren pandemia eragiten ari den osasun krisi, krisi ekonomiko eta soziala existitzen ez ziren urteetako” egitura berbera dute, eta haiek aurkeztutako emendakinen asmoa zen “bizi dugun egoerari ahalik eta hobekien erantzuteko eta digun ahuldadeak eta gabeziak konpontzeko bidean jartzeko” tresnak ematea herritarrei. Hau da, aurrekontuetan koronabirusaren eraginari aurre egiteko diru partida zehatzak eskatu zituzten, eta filosofia horrekin aurkeztu zituzten emendakin bateria. “Ez du zentzurik aurreko urteetako aurrekontu egiturari eusteak, eta are sortu diren beharrei erantzuteko egitasmo berririk ez egotea definituta aurrekontuan”.
Edonola ere, gobernu taldeak EH Bilduren emendakinak aztertzeko konpromisoa hartu zuen.
Mozioak
Aurrekontuan gaiaz gain, bost mozio izan zituzten hamahiru zinegotziek aztertzeko. Honakoak:
- Lehenak Indarkeria Matxistaren Kontrako Egunaren harira aurkeztutakoak izan ziren. Udalbatzak EUDELen adierazpen instituzionala, EH Bildurena mozioa eta PSE-EEk aurkeztutakoa onartu zituen.
- Euskararen Egunari lotuta, EH Bilduren mozioa eta EUDELen adierazpen instituzionala onartu ziren.
- Mendebaldeko Sahararen egoeraren gaineko mozioak aurkeztu zituzten EH Bilduk eta PSE-EEk. PSE-EErena atera zen aurrera.
- EH Bilduk, Jaione Jauregi lezoarraren atxiloketaren inguruko mozioa ere aurkeztu zuen. Aurrera atera zen.
- Amaitzeko, motibazio politikoko indarkeriaren testuinguruan giza eskubideen urraketak jasan dituzten biktimei laguntzeko, biktima horien erreparazioa eta aitorpena tramitatzeko Egia Zor fundazioak aurkeztutako mozioa onartu zen.
