Pasaiako Euskaraldia agurtzeko ekitaldietan izena ematera deitu dute
Euskaraldiaren azken txanpak ikerketa, musika, feminismoa eta jaia izango ditu ardatz. Edizioari agur esateko parte hartzera animatu dituzte pasaitarrak.
Pasaiako Euskaraldiari hasiera eman zion musikadun kamioia, Antxoko kaleetan barrena. 
Pasaiako Euskaraldiaren bigarren edizio honen barne prestaturiko egitarauak ez du inor ezaxola utzi, baina oraindik euskaraz beteriko lau egun gelditzen dira aurtengo ariketari agur egiteko. Honakoak dira hurrengo egunetarako prestatu dituzten jarduerak:
Abenduak 1, asteartea. 19:00etan, Donibaneko Juanba Berasategin, ‘Pasai Donibaneko gazteak euskararen eszenatokian: erabileraren auzia’ ikerketaren aurkezpena.
Abenduak 2, asteazkena. 20:00etan, Antxoko Ibaiondo gunean, musika ekitaldia Musika Eskolaren eskutik. Euskaraldirako Pasaiako gazteek sortutako kantua aurkeztuko dute. Internet bidez jarraitu ahal izango da Pasaiako Euskaraldiaren sareetan.
Abenduak 3, osteguna. 19:00etan, San Pedroko Udal Aretoan, emakumeentzako tailerra: ‘Euskara eta feminismoa: iragana eta etorkizuna aletzen’. Edurne Epelde eta Ansa ahizpa kantariek gidatutako saioa izango da.
Abenduak 4, ostirala. Amaiera ekitaldia 19:00etan Donibaneko Juanba Berasategi aretoan.
Ekintza guztietarako gonbidapena eskura daiteke webgune honetako bilatzailearen bitartez.
