Etxe ondoko naturaz, museoez eta gastronomiaz gozatzeko planak
Oarsoaldea Garapen Agentziak orotariko egitasmoak proposatu ditu, eskualdeko bizilagunek familian, lagunartean nahiz bakarrik goza dezaten asteburu luzeaz.
Familian asteburu luzeaz gozatzeko planak proposatu ditu Oarsoaldea Garapen Agentziak. 
Oarsoaldea Garapen Agentziak naturarekin, kultura eta historiarekin, nahiz gastronomiarekin lotutako orotariko planak proposatu ditu eskualdeko biztanleek zubi honetan zehar inguruko altxorrez gozatzeko aukera izan dezaten. Honakoak dira horietako batzuk:
- Lezo-Altamira-Bordatxo ibilbidea
Oinez zein bizikletaz egin daitekeen 3,4 kilometroko ibilbide erraza eta malda gutxikoa. Bekoerrota kiroldegian hasten da eta bertan ibilbidearen planoa aurkituko dute ibiltariek. Bideak Lezoko Altamira auzoa eta Herriondo bailara zeharkatzen ditu, Lezoko baserri gunea hain zuzen, herriaren eta Jaizkibel mendiaren ikuspegi bikainak eskainiz. Paseo atsegina eta edonorentzat gomendagarria. - Orientazio ibilbidea Aiako Harria Parkean barrena
Mapa esku artean, orientazioa probatzeko eta ibilbidea osatzeko pista jokoa jarraitu beharko dute familiek. Guztira lau ibilbide dira, luzera eta zailtasun desberdinekoak, Barrengoloiako (Errenteria) atsedenlekutik abiatu eta Aiako Harriko Parke Naturalean murgiltzen direnak. Planoak Errenteriako Turismo Bulegoan jaso daiteke. - SL-GI 1007 Arditurrira bira
3,3 kilometroko ibilbide hau egiteko Arditurriko (Oiartzun) meatze gunera gerturatu beharko dira ibiltariak. Puntu horretatik abiatuz, ibilbide zirkularraren marka zuri eta berdeei jarraitu eta, hala, meatze paisaia ikusgarria ezagutuko dute. Esploratzaileen moduan sentitu eta garai bateko meategien sarrerak ikusi ahal izango dituzte, baita bidean mineralak bilatu ere. Bidean ur-kanal bat, putzuak eta ur-jauzi txikiak ikusi ahalko dira. - Pasaiako puntetako bidea
Pasai Donibaneko Bizkaia auzotik abiatu eta zubi etxez eta eraikin historikoz osatutako kale harriztatuan barrena doan bidea da, Donibaneko hirigune historikoa gurutzatuz. Bonantzako elizatik aurrera, bideak Pasaiako Badiaren sarrerara eramango ditu familiak, eta han bokalearen bi aldeetan dauden itsaslabarrak ikusiko dituzte. Bidearen amaieran, Alabortza kala dago, atseden hartu eta paisaiaz gozatzeko egokia.
Haurrekin egiteko ibilbide gehiago aurki daitezke hemen.
Etxe ondoko museoak
Zubi honetan zehar, eskualdeko museoak zabalik egongo dira eta ekintza berezi ugari prestatu dituzte. Hona hemen horietako batzuk:
- Pasaian, Mater Ontzi Museo Ekoaktiboa. Bihar (larunbata) ekoaktibitate bat antolatu dute, ‘Kostaldea ikertzen’ izenpean: Murgita senadia. Igandean, 12:00etan, itsasontzian igo eta Jaizkibelgo itsaslabarrak ikusteko itsasoratzea proposatzen dute. Astelehenean antxoa kontserba tailerra egingo dute, eta gainera etxera eraman ahal izango du norberak prestatutakoa. Azkenik, igandean, ‘Itsas Hondakinen Arrantza’ ekoaktibitatean parte hartzera gonbidatu dituzte interesdunak. Erreserbak 619 81 42 25 telefono zenbakira deituz egin daitezke, edo e-postaz idatziz.
- Albaola Itsas Faktoria. Lasunbaterako egin duten proposamena familia osoarentzat da: ontzi txiki bat eraikitzeko tailerra. Gainera, Albaola irekita egongo da zubian, beti ere aldez aurreko erreserbarekin. Faktoriara itsasontziz joan beharko da, sarreraren prezioan sartuta dagoen zerbitzu hori. Erreserbak: 943 39 24 26 telefono zenbakira deituz edo e-posta bidez egin daitezke.
- Fanderiako Errota. Errotaren funtzionamendua ezagutu eta ibai ondare nahiz kulturari buruz gehiago jakiteko bisita gidatuak eskainiko dituzte. Erreserbak 943 49 45 21 telefono zenbakira deituz edo e-postaz egin daitezke.
- Jantziaren Zentroa. Errenteriako hirigune historikoan, Kapitainenean, Jantziaren Zentroak bere ateak irekiko ditu asteburuan eta jai egunetan, eta mugitu gabe bidaiatu ahal izango du bertaratzen denak modaren historia ezagutzeko eraikin historikoaren barruan. Erreserbak 943 49 45 21 telefono zenbakira deituz egin daitezke, edo e-postaz idatziz.
- Arditurri Meatze Gunea. Zabalik egongo da asteburuan, ohi bezala, eta baita hilaren 8an ere. Meazulo barruan egiten diren bisitez gain, igandean familian egiteko plana eskaini dute: ‘Iparra galdu gabe’ jarduera. Bisitariek Arditurri parketxetik irten beharko dute, inguruan hainbat froga bilatzeko. Erreserbak: 943 495 069 / 688 895 068 / arditurri@gipuzkoanatura.eus.
Oiartzundik irten gabe eta Arditurriko Bide Berdea jarraituz, Luberri, Ikasgune geologikora iritsiko gara, abenduaren 5ean zabalik izango delarik. Erreserbak: 943 26 05 93 telefonoaren bidez edo e-postaz egin daitezke. - Soinuenea Herri Musikaren Txokoa. Ateak irekiko ditu zubian zehar, hilaren 5etik 8ra. Erreserbak 943 49 35 78 telefono zenbakian eta e-postaz idatziz egin daitezke.
Gastronomia etxetik atera gabe
Errenteria-Orereta, Lezo, Oiartzun eta Pasaiako jatetxe eta taberna askok janaria prestatzen dute etxean bertan dastatzeko. Zerbitzu horiek eskaintzen dituzten lokalen zerrenda eguneratua esteka honetan kontsulta daiteke.
