Julene Azpeitia sariketako ipuin, bertsopaper zein poesia sailetan gailendu da Legorburu
Lehiaketaren 35 urteko bidean, lehen aldia da hiru sail horietan pertsona bera saritzen dutela.
Durangoko Julene Azpeitia lehiaketan hiru sari lortu ditu Iñigo Legorburu idazle oreretarrak. Legorburu, poesian, bertsopaperean, eta ipuin sailetan gailendu da; lehiaketaren 35 urteko bidean, lehen aldia da hiru sail horietan pertsona bera saritzen dutela.
Bertsopaper lehiaketan Etxez etxe lanarekin gailendu da, martxo apirila garaiko konfinamenduan osatu ziren herritar sareak hizpide hartuta, Xabier Amurizaren Gai horrek badu mamia doinuarekin. Sari horrekin, 300 euro jaso ditu Legorburuk.
Poesian, berriz, lehentasunez lanak eman dio saria . Hemen ere, 300 euro lortu ditu sari errenteriarrak. Ipuin lehiaketan Azken afarian, Aieteko La Cumbre jauregian torturatzaile jardundako gizon bat da protagonista. 600 euroko saria eskuratu du Legorburuk ipuin lehiaketan gailenduta.
Sari guztiengatik poza azaldu badu ere, ipuin sailean lortutakoak egin diola ilusio gehien esan du egileak: “Torturatzaile baten bizitzan sartzen saiatu naiz, nire buruari mila galdera egin ostean: zerk eramaten du pertsona bat torturatzaile izatera? Bulego ordutegia dauka torturatzaileak? Nola deskonektatzen du halako astakeriak egin dituen pertsona batek?”.
Urtea ongi amaitzeko sari biribila oreretarrak lortu duena.