Gaur, Hezurbeltzak Gezalan
Hezurbeltzak taldeak kontzertua emango du gaur Gezalan; sarrerak agortu egin dira. Bihar haurrentzako txotxongiloak daude, eta igandean antzerkia.
Hezurbeltzak taldea. Datozen egunetarako hainbat kultur jarduera daude antolatuak Lezon. Lehena gaur da. Hezurbeltzak taldeak kontzertua emango du Gezala Auditoriumean, 19:30ean hasita. Sarrerak agortuta daude. Jon Maia bertsolariak, Gorka Hermosa akordeoi jotzaileak eta Pitti gitarristak osatzen dute taldea. Poetika, kritika, umorea eta edertasuna uztartuz, eta atrezzo eta giro bakan baten baitan aurkeztuak dira haien abestiak, askotariko edukiekin, sozialak gailenduz.
Bihar (ostirala) haurrentzat txotxongilo emanaldia izango da Gezalan, 17:15ean. Oilar bat dago zure teilatuan lana aurkeztuko du Madrilgo Titiriguiri konpainiak. Sarreren prezioa bi eurokoa da eta Lezoko Udalaren tiketen salmenta gunean nahiz Kultur Sailean eros daitezke.
Igandean, antzerkia Gezalan. Zoaz bake santuan antzezlana taularatuko du Txalo Produkzioak taldeak. Sarrerak agortu egin dira.
Musika Express bonua
Lezoko Udalak bat egin du Musika Express egitasmoarekin. Hala, hainbat musika taldek egiten duten zirkuitua da, herrika doazenak. Lezoko emanaldietara joateko bonua eros daiteke, 30 eurokoa. Gaurko Hezurbeltzak taldearen kontzertua horren barrukoa da. Abonua eskuratzeko Lezoko Udaleko webgunera joan daiteke.
