Kutxabankek zerbitzu aldaketak egingo ditu Donibanen eta San Pedron
San Pedron ez da aurrez aurreko zerbitzurik izango gaurtik aurrera, eta Donibaneko bulegoa itxita egongo da astearte nahiz ostegunetan.
Donibaneko Kutxabanken sukurtsala itxita egongo da astearte eta ostegunetan. 
Pasaiako alkate den Izaskun Gomezek iragarri du Donibane eta San Pedroko Kutxabanken kutxazainetan nahiz aurrez aurreko zerbitzuetan hainbat aldaketa izango direla gaurtik aurrera eta datorren urtetik aurrera.
San Pedron, pertsonalaren berregituraketa arrazoiengatik, kutxazainak soilik irekiko dituzte gaurtik aurrera; ez da, beraz, aurrez aurreko zerbitzurik izango. Orain arte ere ez zen leihatila zerbitzurik, eta eskaintzen zen aurrez aurreko zerbitzu bakarra bezeroen eta gestoreen arteko bilerak izan ohi ziren; gaurtik aurrera, baina, aukera hori ere ezabatuko dute eta gestorearekin bildu nahi duenak Trintxerpeko sukurtsalera bertaratu beharko du.
Donibaneko bulegoari dagokionez, leihatila zerbitzua mantenduko dute (astelehen, asteazken eta ostiraletan, orain arte bezala), baita kutxazaina eta gestoreen zerbitzua ere. Astelehen eta ostegunetan, baina, guztiz itxita egongo da bulegoa 2021a hasten denetik.
