Pasaiako udalbatzak aho batez egin du bat Lizeoarekin
Pasaiako Udalak, talde politiko guztien adostasunez, Pasaia Lezo Lizeoarekin hitzarmen berria sinatu du, euskararen eta mugikortasun iraunkorraren alde.
Hitzarmen berriak euskara eta mugikortasun iraunkorra izango ditu ardatz. 
Pasaiako udalbatza osatzen duten alderdi politiko guztiek aho batez onartu zuten, pasa den ostiralean izandako plenoan, Pasaia Lezo Lizeoarekin elkarlanean aritzeko hitzarmena. Lankidetza plan berriak euskara eta mugikortasun iraunkorra izango ditu ardatz.
Alderdi politiko guztiek hitzaldia eskaini zioten ikastetxeari, bertan egiten den lana goraipatuz eta etorkizunean ere elkarlanean jarraitzeko nahia nabarmenduz.
Ikastolako ordezkariak ostiral arratsaldeko ezohiko udalbatzarrera bertaratu ziren, akordioa lortu izanagatiko esker ona adierazteko asmoz. Lizeoko zuzendari den Edurne Urkiolak hartu zuen hitza: “Guretzat berririk pozgarriena lau alderdien adostasuna eta batera ikastolari egindako aitorpena da”.
Udalak euskararekiko aitortza babesa egiteaz gain, berme ekonomikoa ere ahalbidetu izanaren garrantzia jarri zuen mahaigainean Urkiolak: “Ikastolako familiek, zinez, eskertuko dute”; eta nahiz eta aurreko hitzarmenarekin alderatuz galera ekonomiko bat baden, ulerkorki mintzatu zen: “Pandemiak eragindako egoera ekonomikoan badakigu udalak ahalegina egin duela lortutako kopuruetara iristeko”.
