Trintxerpeko Jai Batzordeak udalaren babes "irrigarria" salatu du
Taldekideek euren ezinegona adierazi dute Pasaiako Udalak Olentzero, Maridomingi eta Errege Magoei herrian harrera egitea ez baimendu izanagatik.
Ezingo zaie aurten Maridomingi eta Olentzerori harrera egin Trintxerpen. 
Trintxerpeko Jai Batzordeak taldekideen ezinegona adierazi du Pasaiako Udalak batzordeak eta erakunde laguntzaileek Trintxerpeko barrutian Gabonak modu seguru eta parte hartzailean ospatzeko egindako proposamenen aurrean erakutsi duen jarreragatik: “Eusko Jaurlaritzak ezarritako baldintza guztiak betetzen dituen segurtasun protokolo batean lan egin ondoren, eta ekitaldia egiteko bi egun falta direnean, Pasaiako Udalak ezezkoa eman digu”.
Jai Batzordeak uste du egin duten lana ez dela baloratzen eta udalaren babesa “barregarria” dela. Horrexegatik, euren haserrea adierazi nahi izan dute mahaigainean jarriz ekitaldi hori ez baimentzeak herriko gazteak kaltetzen dituela, eta ezin uler dezaketela protokoloa hitzez hitz jarraitzen duen iniziatiba bat zergatik ezin egin daitekeen, jendea elkartzeko beste hainbat -eta beste hainbat lekutan ere- egingo direnean.
Ohar osoa irakur daiteke honako esteka honen bidez.
