[Galeria] "Emakume eta gazteak etorkizunik ilunenera kondenatzen ari dira"
Hotzari eta euriari aurre eginez bildu dira beraien hileko lehen asteleheneroko hitzordu puntura, Herriko Plazara, eta enegarrenez aldarrikatu dute zahartzaro duin baterako eskubidea.
Pentsio duinen aldeko aldarriak ez du hutsik egin gaur ere. Berriro hartu ditu kaleak gaur Duintasuna Jubilatu eta Pentsiodunen elkarteak. Hotzari eta euriari aurre eginez bildu dira beraien hileko lehen asteleheneroko hitzordu puntura, Herriko Plazara, eta enegarrenez aldarrikatu dute zahartzaro duin baterako eskubidea.
Pandemiak inoiz baino ageriago utzi duela osasun publikoa birpentsatu eta sendotzeko beharra esan dute bildutakoek, “lehen arreta, menpekotasunena eta osasun publikoa bezala pentsio publikoak blindatzea ezinbestekoa dugu”. Toledoko Ituna izan dute hizpide, eta haren gomendioek pentsio publiko duinak bermatzea oztopatzen dutela salatu dute elkarretaratzean, “enpresa eta aseguruei mesede egiten dien bitartean, pentsio publikoak kaltetzen dituelako”.
Pentsiodun eta jubilatuak kaltetzeaz gainera, okerrena, emakume eta gazteentzat izango dela salatu du Duintasunak: “Etorkizunik ilunenera kondenatzen ari dira”. Pentsiodunen borrokarekin hainbat aurrerapen lortu badituzte ere, oraindik ere bidea luzea dela ekarri dute gogora, eta borrokara batzera deitu dituzte herritarrak, pentsio, zahartzaro, lan baldintza eta bizitza duinaren alde.
Elkarretaratzearen ostean, ohikoa baino motzagoa izan bada ere, manifestazioa egin dute.
