Kultura erruz, ez aspertzeko
Musika, antzerkia eta erakusketa izango dira aste honetan, kulturaz gozatzeko.
Zetak taldeak emanaldia egingo du gaur. Agenda lepo dator aste honetan, eta ez da aspertzeko aukerarik izango, behintzat, kulturari dagokionean. Gaur bertan Zetak taldeak emanaldia eskainiko du. Pello Reparazen taldeak 17:00etan emango du kontzertua Niessen Kulturgunean.
Ez da urte berriko lehen asteko musika ekitaldi bakarra izango gaurkoa, ostegunean, Amorante eta Verde Pratok hartuko dute lekukoa. Amorante, Iban Urizar gitarra, ukelelea, tronpeta, harmoniuma, zintzarria eta perkusio tramankuluekin igoko da Niessen Kulturguneko oholtzara. Ezohikoa, askotariko erreferentziak batuz estilo oso pertsonala osatu duelako eta benetakoa delako bere apustua. Verde Pratoren atzean, Ana Arsuaga, eta abesti herrikoien kutsua. Sinpletasunaren aldeko apustua egiten du Arsuagak. Emanaldia 18:30ean izango da.
Hurrengo hitzordua Mugmus Laborategia eta Eider Rodriguez idazle errenteriarrarekin izango da kulturgunean bertan, ostiralean, 19:00etan. Garaiz: 60t.m ikuskizuna taularatuko dute elkarlanean. Larunbatean Vaven Circoren Esencial ikuskizunak hartuko du ekitaldien txanda; 19:00etan izango da. Igandean antzerkiaz gozatzen jarraitzeko beste proposamena, Proyecto 43-2: Rescoldos de paz y violencia. 19:00etan izango da emanaldia eta honakoa proposatuko duen agertokia: Bost pertsona, errealitateari buruzko bost pertzepziorekin.Bost harreman indarkeriarekin.
Eskaintza borobiltzeko, Jantziaren Zentroan larunbatean ateak zabalduko dituen erakusketa: Egunsentia: Torrekuatik diseinatzen. Saioa Matxain, Ane Gajate eta Ruben Pantiga, Habian! hazitegiko egoiliar eta moda diseinatzaileen proposamenekin osatutako erakusketa. Larunbatetan 11:00etatik 14:00etara eta 17:00etatik 20:00etara bisita daiteke, eta igande eta jai egunetan, 12:00etatik 14:00etara. Doan da.
Beste ikuskizunetarako sarrerak bibe plataformaren bidez, edota Niessen Kulturguneko leihatilan eskura daitezke.
