[Elkarrizketa] «Herrian gertatzen direnak kontatzea gustatzen zait»
Herrian ikusten denaren argazkiak egin eta kontatzea du gustuko Juan Diego Ramos ‘Pelukas’-ek. Prentsa saltzaile eta ostalari izan da, eta ‘kale kazetaritza’ izan du betidanik amets. ‘Zaria’ aldizkariaren proiektua du esku artean.
Juan Diego Ramos 'Pelukas' oso ezaguna da herrian. Zaria aldizkariaren berri eman duzu sare sozialen bidez. Zein da proiektua?
Denbora neraman nire blogean gauzak kontatzen. Herrian gertatzen diren gauzak kontatzea gustatzen zait, unean uneko albisteak direla, edota jendearen gaineko kontuak direla; azken hori da gehien gustatzen zaidana. Blogean herriko kirol eta musika talde edo norbanakoen gainekoak kontatu ditut. Indarra hartu du, eta egun 115 harpide ditut; egunero jasotzen dute nire blogean argitaratzen dudana. Aterpe etxe agentziako nagusiak esan zidan gustuko zuela egiten nuena, eta ea ez ote nuen planteatu euskarri fisikoa ematea.
Animatu nintzen, hainbat merkatarik esan didate publizitatea jartzeko prest daudela, eta aurrera egin dut. Ostalaritza krisiak betean jo nau, langabezian nago eta une egokia iruditu zait.
Zaria izena, zergatik?
Oreretako mendirik altuena delako. Zariaren gailurretik herri guztia ikusten da, eta proiektu honen helburua da herri guztiari erreparatzea.
Zer espero duzu proiektu honetatik?
21 urte eman ditut kalean egunkariak saltzen kiosko batean, eta egia da papereko gero eta gutxiago dagoela, baina jendeari gustatzen zaio paperekoan irakurtzea. Beste dimentsio bat du mahaian lasai eseri, kafea hartzen duzun bitartean, edo bazkalostean, eta aldizkaria irakurtzeak. Hau ez da nire bizibidea izango, gustuko dudana egingo dut soilik.
Zenbatero argitaratuko duzu?
Ez dut ezer itxia. Hiru hilerokoa izatea aurreikusi dut, baina gerora aldatzeko aukerak badaude, beharraren arabera.
Gogorik ez duzu falta, baina zer izaten ari da zailena?
Ideiak oso argi ditut. Ez naiz inoren menpekoa finean, argazkiak nik egingo ditut, nik idatziko dut… Proiektua autosufizientea izango da baliabide pertsonalei dagokienean, eta ez diot, beraz, arazorik ikusten.
Maketazioarekin ziurrenik laguntza eskatu beharko dut, baina gainontzean ez diot arazorik ikusten. Ongi ateratzen bada, primeran; ez dela ongi ateratzen, gutxienez gustuko dudan hori egiten saiatu naiz, ez dela gutxi.
Uste dut hobeto dela zartakoa hartzea egiten duzun bitartean, bizitza osoa saiatu ez izanagatik penatuta ematea baino.
Zein hizkuntzatan egingo duzu Zaria?
Informazioaren zati handi bat euskaraz izatea aurreikusi dut, ezin dut zehaztu oraintxe zenbat.
Eta noiz aterako duzu argitara lehen zenbakia?
Gauzak ondo bidean urtearen bigarren hiruhilekoan izango da, hori da nire asmoa, baina oraindik gauza batzuk lotu behar ditut; aurten, ziur.
Harpidetza bidez banatuko duzu?
Ez dut hori pentsatu. Udalak laguntzen badu, doakoa ere izan daiteke. Ez badut laguntzarik, gastuak behintzat estali behar ditut; izatekotan, prezio sinboliko bat izango du.
Bloga mantenduko duzu?
Bai, mantenduko dut. Bertan eguneko albisteak landuko ditut, eta erreportajeak aldizkarian jasoko ditut.
