Pasaia konfinatuta eta ostalaritza itxita, ostiraletik aurrera
Eusko Jaurlaritzak argitaratutako azken txostenean gorriz markatu dute udalerria, 508,31ko tasarekin. Atzo zortzi PCR positibo zenbatu zituzten.
Udalerriaren guztizko itxiera ostiralean sartuko da indarrean. 
Atzo zortzi Koronabirus kasu positibo hauteman zituzten Pasaian, eta azken datu horrekin eremu gorrian sartu da udalerria, 508,36ko tasarekin -langa 500ean dago ezarrita-. LABI aholku batzordeak bihar -osteguna- iragarriko du zeintzuk diren azken egunotan zonalde gorritik sartu eta atera diren eremuak, eta horien egoera berria indarrean sartuko da ostiralean. Alegia, ostiraletik aurrera -egun hori barne- ezingo da Pasaiatik ez sartu ez atera, eta ostalaritzaren guztizko itxiera aginduko du udalak.
Aipatutako murriztapenez gain, kirolean ere hartu beharko dira hainbat erabaki berri. Azken horien detailea zehazteko, alkate den Izaskun Gomezek Gazteria eta Kirol Departamentuari eskatu dio txosten bat egin dezan pasaitarrek izan litzaketen zalantzak argitzeko helburuz. Dokumentu hori ahal bezain pronto jarriko du bizilagunen eskura Pasaiako Udalak.
Egoerari aurrea hartzeko bildu zen atzo Pasaiako Larrialdi Taldea udaletxean. Gomezek adierazi du, oraingoz, Pasaiako udalbatzak ez duela aurreikusi ostalarientzako laguntza lerro berririk martxan jartzea, baina egoeraren bilakaeraren baitan egokituko dela udala pasaitarren beharretara. Bien bitartean, “ardura eta zentzutasunez” jokatzeko eskatu die alkateak bizilagunei.
