Aitor Zelaia eta Galder Barbadori elkartasuna adierazi diete
Ernai gazte antolakundeak deituta elkarretaratzea egin dute gaur arratsaldean Aitor Zelaia eta Galder Barbado gazteei elkartasuna adierazteko.
Ernai gazte antolakundeak deituta elkarretaratzea egin dute gaur arratsaldean Aitor Zelaia eta Galder Barbado gazteei elkartasuna adierazteko. Zelaia amurrioarrak eta Barbado gasteiztarrak Espainiako Auzitegi Nazionalean deklaratu dute gaur eta bihar ere epaile aurrean izango dira. Joan den urtean atxilotu zituen bi gazteak Ertzaintzak Duranan aurkitutako suziri batzuen harira. Hainbat hilabetez espetxean izan ondoren, joan den urteko abuztuan baldintzapean askatu zituzten bi gazteak.
Orain, zortzi urteko espetxe zigorra, zazpi urteko zaintzapeko askatasuna, eta hamabost urteko gaitasungabetzea eskatu du bientzat fiskaltzak.
Herriko Plazan egin dute elkarretaratzea; elkartasuna eta besarkadarik beroena helarazi diete bi gazteei bildutakoak eta ozen esan dute ez dutela epaiketa onartzen, “Aitor eta Galder Euskal Herrian aske nahi eta behar ditugu”. Espainiako Estatuari bere makinaria errepresiboa berriro martxan jartzea egotzi diote: “Justizia deitzen dioten legedi faxistaren bidez epaituko dituzte Aitor eta Galder. Argi daukagu Espainian ez dagoela demokraziarik, eta gazteok ez dugu onartzen injustizian oinarritutako epaiketa hau, gazteria zigortzea eta beldurtzea baitu helburu”.
Absoluzioa ez den beste epairik ez dutela onartuko esan dute. Espainiako Estatuaren “aparatu errepresiboa” ondo ezagutzen dutela erantsi dute, “epaiketa eta prozesu judizialak, indar judizialen jazarpena, mehatxu eta bortizkeria, isun ekonomikoak, manipulazio mediatikoa…Gertutik ezagutzen dugu, belaunaldiz belaunaldi, herri honen askatasunaren alde borrokatzeagatik jo puntuan egon baita euskal gazteria”.
Salatu egin dute gainera, Espainiako Estatuaren etengabeko saiakera gatazka politiko armatua betikotzeko, “konponbidea blokeatzen dute, euskal herritarrok gure herriaren etorkizuna, libreki erabaki dezagun galarazi nahian; baina gazte belaunaldi honek ere, injustizia guztien gainetik Euskal Herri feminista, sozialista eta euskalduna lortzeko borrokatzeko hautua hartuta dauka”.
Militantzia politikoa gelditzerik ez dutela lortuko esan dute azkenik, “jarraitu dezagun borrokan, jarraitu dezagun herria eraikitzen”.
