Nazkatuta hartu du kalea mugimendu feministak
Astelehenean Errenteria-Oreretan izan zen eraso matxista salatu dute gaur hamarnaka lagunek.
Astelehenean Errenteria-Oreretan izan zen eraso matxista salatu dute gaur hamarnaka lagunek. Zumardira bildu dira Oreretako Mugimendu Feministak deituta. Nazkatuta eta amorruz gainezka azladu dira bildutakoak, berriro kalera atera behar izan dutelako eraso matxista bat salatzera, “gizon batek ez zuelako ezezkoa ulertu beste behin ere”. Joan den urteko indarkeria matxistaren gaineko datuak gogora ekarri dituzte eta Oarsoaldea eta Bidasoko herrietan indarkeria matxistarekin lotuta egindako salaketei tartea eman diete; Hondarribian 21 izan ziren, Irunen 152; Oiartzunen 15; Oiartzunen 18; Pasaian 26; eta Errenteria-Oreretan, 86. “Hau bai pandemia latza” salatu dute.
Erasoen aurrean autodefentsarako hautua adierazi dute, eta enegarrenez esan ozen ez direla biktimak, ezta subjektu pasiboak ere, eta ez direla instituzioetatik bultzatzen diren neurri asistentzialekin konformatzen, “kontziente gara, aldiz bidea luzea dela, eta herrian sufritu dugun indarkeria matxista errotik ezabatzeko, polizia eta epaile neurri zigortzaileez gain, bestelako jarrera, ekintza eta neurri beharko ditugula”. Politika errealak aldarrikatu dituzte gaur ere, “aurrea hartu behar dugu, eta batez ere ezarritako ordenua irauli”.
Lehendakaritzari kritika zorrotza egin diote: “Emakunde Emakunde baztertu egin dute eragiteko ahalmenik ez duen departamentu batera delegatuta. Ezinbestekoa da parekidetasun organoak presidentzietan kokatu behar zirela politika publikoen genero zentralitatea eta zeharkakotasuna bermatzeko. Markel Olanoren gaitzespen komunikatua baino interesgarriagoa da egunean egunean zor diguten ardura; hipokrisiarik ez”. Kalea emakumeena ere badela esan dute eta auzo eta herrietan libre ibili nahi dutela, “eraldaketa bidean espazio guztiak hartu behar ditugu emakumeok, plazak, kaleak, komunak, udalak, antzokiak… nonahi, noiznahi, nolanahi, libre mugitzeko eskubidea aldarrikatzen dugu”.
Erasoen aurrean ez direla kikildiko esan dute azkenik, ezta ixilik geldituko ere, “autodefentsan sakontzen jarraituko dugu, bai indibidualki, bai kolektiboki; erasotzaileak ize abizenekin ezagutu, gure kaleetatik baztertu eta kanporatu arte ez dugu etsiko”.
