Aintzane Pujanaren hilketa salatzera bilduko dira gaur Antxon, Errenteria-Oreretan eta Oiartzunen
Donostiarraren hilketa salatzeko mobilizazioak 13:00etan dira hiru tokietan. Emakumeen Mundu Martxak deitu ditu Euskal Herri osoan.
Donostiarra zen Aintzane Pujana. Atzo egin zuten han elkarretaratzea. Aintzane Pujanaren hilketa salatzeko elkarretaratzeak egingo dituzte gaur eguerdian Antxon eta Errenteria-Oreretan. Antxokoa 13:00etan da, Gure Zumardian. Errenteria-Oreretakoa ordu berberean da, Gamon Zumardian. Oiartzunen ere egingo dute bilkura, Feministen Asanbladak deitutakoa, 13:00etan Done Eztebe plazan.
32 urteko emakumearen gorpua urtarrilaren 4an aurkitu zuten, Aizarnazabalen, eta hilaren 13an bi pertsona atxilotu zituen Ertzaintzak: 24 urteko gizon bat eta 23ko emakume bat, biak errenteriarrak.
Ikerketa sekretupean da, baina, asteon Berria egunkariak baieztatu duenez, hilketa leporatzeaz gain, Pujana legez kanpo atxikitzea eta sexualki esplotatzea ere egotzi diete atxilotuei. Indarkeria matxistaren kutsua du, hortaz, kasuak, eta Emakumeen Mundu Martxak kalean salatzera deitu du.
