[Galeria] "Biolentzia matxistaren pandemia" salatu dute
Euskal Herriko Emakumeen Mundu Martxaren protokoloari jarraiki, Aintzane Pujanaren hilketa salatzera bildu dira gaur indar feministak herriko plazetan.
Oiartzunen egin duten elkarretaratzearen une bat. Aintzane Pujanaren hilketak berriz ere atera du mugimendu feminista kalera. Euskal Herriko Emakumeen Mundu Martxaren protokoloa aktibatuta, gaur, Oiartzunen, Errenteria-Oreretan eta Antxon elkarretaratzeak egin dituzte Euskal Herriko beste hainbat herritan egin bezala. Pujanaren hilketa gertaera soila ez dela adierazi dute: “Biolentzia matxistaren pandemia” salatu dute, “mendeak daramatza gure mundu honetan”.
Matxisten indarkeriaren pandemiaz inor ez dela arduratzen esan dute Emakumeen Mundu Martxatik, “baina gizartearen erdiari eragiten digu zuzenean eta ozen salatuko dugu ez gaudela prest gaitz hau gehiago jasateko. Feminismoa da daukagun antidoto bakarra eta gizarte guztian zabaltzen saiatuko gara”.
Indarkeria sexistari aurre egiteko zaintza sareen beharra nabarmendu dute, “modu berriak bilatu
behar izan ditugu harremanak zaintzeko, baina inoiz ez dugu indarkeriaren aurka borroka egiteko indarra galduko”. Biolentzia matxista lehen mailako arazo politiko izan dadila eskatu du indar feministak.
“Honekin batera autodefentsa feministarako deia egiten dugu, gure bizitzak direlako jokoan daudenak eta bizitzaren aldeko apustu erradikala egiten dugulako. Feministok erantzuteko prest gaude. Martxan jarraituko dugu, elkarrekin borrokan denak aske izan arte!”, erantsi dute.
Ondokoak, Errenteria-Oreretako, Antxoko eta Oiartzungo hainbat irudi dira.
-
- Oiartzungo mobilizazioa.
-
- Oiartzungo mobilizazioa.
-
- Oiartzungo mobilizazioa.
-
- Errenteria-Oreretako elkarretaratzea.
-
- Errenteria-Oreretako elkarretaratzea.
-
- Antxoko bilkura.
-
- Antxoko bilkura.
-
- Antxoko bilkura.
