Elikagaien industriaren etorkizun digitala aztertzeko webinarra
Sektorean sartzen ari diren teknologia berriak aztertu eta lehiatzeko funtsezko alderdiak azalduko ditu Erich Eichstetterek otsailaren 5ean, online.
Erich Eichstetterek doako webinarra eskainiko du otsailaren 5ean, Zoom plataformaren bitartez. 
Teknologiaren eta elikagaien industriaren arteko lotura aztertzeko doako webinarra antolatu dute hurrengo hileko ostiralerako -otsailak 5-, Oarsoaldea, Debegesa eta Tolosaldea Garatzen garapen agentziek. Topaketa Zoom plataformaren bidez egingo da eta ordubeteko iraupena izango du, 10:00etan hasita.
Elikagaien industriaren etorkizun digitala izenburupean, Erich Eichstetterek, LABe digitalaren gastronomy lab arduradunak, elikagaien industrian sartzen ari diren teknologia berriak aztertuko ditu, baliabide teknologikoak erabiliz lehiatzeko kontuan hartu beharreko funtsezko alderdiak zein diren azalduz.
Eichstetter sukaldari eta diseinatzaileak hamabost urteko esperientzia du Espainian, Alemanian eta Latinoamerikan, eta Tech Scoutingen eta teknologia digital berrien, prozesuen eta jatetxeetarako produktuen garapenean espezializatuta dago.
Jardunaldian aldez aurretik izena ematen dutenei hainbat kasu arrakastatsu aurkeztuko zaizkie, eta parte hartzaileek zalantzak Erich Eichstetterri jakinarazteko aukera izango dute. Agentziek elikagaien sektoreko pertsona eta enpresa guztiak animatu dituzte parte hartzera eta bilkurako informazioa partekatzera.
