Asko dute jokoan asteburu honetan Pasaiako futbolariek
Antxo A.F.-rentzat bultzada izan liteke igandeko lehia. Pasaia K.E.-k lehen postua bermatu edo kolokan izan dezake, larunbateko jardunaldiaren baitan.
Pasaiako bi futbol taldeek asko dute jokoan asteburu honetan, euren multzoetako sailkapenetan postu gorenetan baitaude: Lehenengoan Pasaia K.E. eta hirugarrenean Antxo A.F.
Pasaia K.E.-k adierazi du gogotsu ekingo diotela jokalariek biharko lehiari: “Plazera izango da Jesus Mari Zamoran talde oso lehiakor bat hartzea”. Larunbatekoa ez da beste partida soil bat izango, izan ere, asko dute jokoan asteburu honetan hamaikakoek, podiumean bigarren daudenen aurka baitute lehia: Urduliz.
Bizkaitarrek 22 puntu dituzte gaur, eta etxekoek 25; bisitariek garaipena lortuko balute, Pasaiaren lehen postua arriskuan egon liteke. Partida 16:30ean hasiko da, Errenteria-Oreretako zelaian.
Ferreresen areto futbolekoek igandean dute hitzordua, 10:30ean Uzturpe frontoian (Tolosa), Tolosalaren aurka. Hamargarren jardunaldi hori bultzada izan daiteke pasaitarrentzat, sailkapenean azken direnen aurka jokatuko baitute. Orain arte fin ibili dira Antxo A.F.-ko jokalariak, euren multzoko bigarren postutik lau puntura daude.
