'Fanekas' bisitarik gabe, Villenako espetxean COVID-19 agerraldia atzeman ostean
Fanekas dagoen moduluan ez dute hauteman COVID-19 positiborik.
Euskal preso eta iheslarien etxeratzea eskatzen duen banderola leiho batean. Bizimodua hankaz gora jarri du COVID-19aren pandemiak, eta kalean egoera hori gogorra bada, zer esanik ez espetxeetan. Espetxeetatik heldu da gaur, hain zuzen ere, berria, Villena (Alacant) eta Picassent (Herrialde Katalanak) kartzelak itxi egin dituzte. Bietan COVID-19 agerraldia hauteman dute eta 200 positibo zenbatu dituzte, guztira; bi espetxeen artean, 500 preso daude konfinatuta, egun, baina kopuru horrek gora egin dezake.
Horietako batean aurkitzen da Juan Lorenzo Aiestaran Legorburu Fanekas preso lezoarra, Villenan zehazki, Euskal Herritik 700 kilometrora.
Bera dagoen moduluan ez dute hauteman COVID-19an positiborik presoaren gertukoek jakinarazi dutenaren arabera, baina espetxea itxi dutenez, Picassenntekoa bezala, ez du bisitarik izango Fanekasek, ezinbestekoak diren lanak egiteko baino ez dutelako baimenduko espetxera sartzea. Egoera zenbat luzatuko den ez dago jakiterik.
