"Zuzenekoetan jendeak nola erreakzionatzen duen ikusi nahi dut"
Diskoa grabatu du 20 urteko lezoarrak, baina udaberrira arte ez du jendartera zabalduko. Txikitatik datorkio oholtzak zapaltzeko bokazioa, eta zuzenekoetan bere abestiekin ikusleek zer sentituko duten jakiteko irrikaz dago.
Lehen diskoa argitara emango duzu udaberrian. Zer aurrera daiteke?
Nire aurkezpena egiteko modua izango da. Nire intereseko gaiak landu ditut abestietan, sentimenduei dagozkienak, baita gizarte salaketa arlokoak ere. Azken batean, nire alde ezberdinak azaldu nahi ditut, sentikorra eta kritika soziala agertzen dutenak. Apirila amaiera aldera ateratzea da asmoa, baina bizi dugun egoerarekin ikusi beharko.
Banda batekin grabatu duzu diskoa Mutrikuko AME estudioan. Zuzenekoetan ere taldearekin ariko zara?
Grabazioan, baterian Aritz Lauroba aritu da, eta gitarra, baxu, eta pianoan Iker Lauroba. Baina zuzenekoetarako Gipuzkoako hainbat herritako kideekin banda bat osatu dut, 18-21 adin tartekoak.
Nor da Ilargi? Nola iritsi zara musikaren mundura?
Txikitatik izan dut interesa arte eszenikoetan eta musikan. 5 urterekin euskal dantzan hasia nintzen, 6-7rekin musikan eta antzerkian. Beti sentitu dut hori zela nire mundua. Tomas Garbizu Musika Eskolan izan nuen lehen harremana musikarekin, tartean trikitia jotzen. Trikitiarekin abesten nuen, baina ez nituen kantu-eskolak jasotzen. Etxean bai, abesten nuen. Gogoan dut oso txikia nintzela mikrofono arrosa oparitu zidatela, eta egun osoan izaten nintzela abesten. 14 urterekin hasi nintzen gitarra eskolak jasotzen; instrumentu horrek abestera bide ematen dizu. Konposatzen ere ikasi nuen, Irungo Skola Musik-en: harmonikoki abestiak nola sortu ikasi nuen han. Gerora, 15 urterekin, Marga Altolagirreren laborategian kantu ikasketak jaso nituen, baita antzerkiarekin jarraitu ere. Antzerkigintzan Bilboko Dantzertin sakondu nuen.
Bide luzea duzu egina, beraz.
Horrela da. Antzerkiarekin ikasi nuen istorioak nola sortu, eta mezuak transmititzeko aldaketa ezberdinak egon behar direla. Beraz, hasierako abestiak plano samarrak ziren arren, antzerkiko ikasketekin forma gehiago hartu zuten.
Eta hortik disko bat egitera.
Musika jaialdi batean ginela kuadrillako batek esan zidan egunen batean zer edo zer argitara emango nuela. Lagunak bazekien etxean abesten nuela, baina han gelditzen zela dena. Ordutik, euskal kantuen bertsio gehiago egiten eta sare sozialetara igotzen hasi nintzen, kontzertuak ematen hasi nintzen, eta horietan nire abestiek jendearen harrera ona zutela konturatu nintzen. Diskoa egitea erabaki nuen.
Lehenengo singlea eta bideoklipa Betirarte abestiarekin kaleratu duzu. Zergatik?
Naizena dezente ondo definitzen du. Bigarren eta hirugarren singleekin eta bideoklipekin batera istorio bat sortu nahi dut. Abesti aproposa da Betirarte nahi dudan mezua zabaltzeko: maitatzeaz hitz egiten du, bakoitza den bezalakoa izaten, apaingarririk gabe.
Zail dago orain zuzenekoena.
Diskoa ateratzerakoan aurkezpen bira egitea da nire asmoa. Egoera honekin egunez egun joan behar da, ordea. Zuzenekoetan jendeak nola erreakzionatzen duen ikusi nahi dut, abestea ere komunikatzeko bide bat delako.
