2.204 langabe daude Errenteria-Oreretan
2020ko otsailetik (pandemia hasi aurretik) abendura, tasa %10,1etik %11,3ra igo da. Langabe gehienak emakumeak dira, eta 45 urtetik gorakoak.
Lanbidek 2020ko abenduaren 31ra arte jasota dituen datuen arabera, Errenteria-Oreretan 2.204 pertsona daude lanik gabe, %11,3ko langabezia tasarekin. Horietatik 1.193 emakumeak dira (%12,8ko tasa), eta 1.011 gizonak (%9,9ko tasa). Iazko otsailaren bukaeran, hau da, pandemia hasi aurretik, 1.979 ziren herriko lanik gabeak, %10,1eko tasa orokorrarekin: horietatik 1.124 ziren emakumeak (%12,0ko tasa(, eta 855 gizonak (%8,3ko tasa). Beraz, pandemia hasi aurretik baino herriko 225 pertsona gehiago daude Lanbiden izena emanda.
Gaur egungo datuei erreparatuta, zehazki adinen araberako langabezian, herriko langabe gehienak 45 urtetik gorakoak dira, 1.098 orotara (588 emakume eta 510 gizon). Ondorengo adin segmentua 26-44 tartekoena da, 895 langaberekin (503 emakume eta 392 gizon). 25 urtetik azpikoen artean 211 dira lanik gabeak (102 emakume eta 109 gizon).
