Lotsak baztertuta euskaraz bizitzeko urratsa
Izena emateko epea zabaldu du Mintzalaguna programak. Hogei urte beteko ditu aurten Lau Haizetarak kudeatzen duen egitasmoak euskaraz lasai hitz egiteko eremuak eta aukerak eskaintzen.
Mintzodromoa Errenteria-Oreretan. Lotsa baztertuta, giro lasaia eta atseginean euskaraz lasai mintzatzeko aukera eskaintzea du helburu Mintzalaguna programak. Lau Haizetara Euskaltzaleon Topagunearen eskutik, aste honetan bertan zabaldu dute izena emateko epea. Enara Alfonso dabil arduradun lanetan. Ez da erraza izan aurreko urtea, ezta honakoa ere: «Bitan egiten da izen ematea programarako, irailean eta urrian, eta irailekoa ezin izan genuen egin arazo teknikoengatik». Orain, otsailaren 5era arte izango dute aukera izena emateko euskaldun berriek, edota euskaldunak izanik ere, ez erabiltzeagatik euskara herdoilduta dutenek. Hartzaileak ugariak baitira, ohikoena euskaltegietako ikasleak bertaratzea bada ere. Parte hartzea doakoa da, eta guztiz malgua.
Pandemiaren agertokian ezarritako neurri guztiak errespetatuta, taldean biltzen dira euskaraz aritzeko mintzalaguntzaileak eta mintzalagunak. Mintzalagunen eskutik galtzen dute akatsak egiteko beldurra, segurtasun eza, eta lotsa. Baina protagonismoa mintzalagunei eman die Alfonsok: «Urratsa aurrera egin dute, euskaraz bizitzeko hautua, eta aitortu egin behar diegu egiten duten esfortzua nahi hori egi bihurtzeko». Nahia. Hori omen da gakoa. «Inor ez dator derrigortuta mintzalaguna proiektura. Gogotsu, euskaraz aritzeko eta euskaraz bizitzeko gogoz datoz; programaren bidez, espazio bat ematen diegu euskaraz aritzeko».
Oraintxe bertan zortzi talde eta 30 bat lagun ari direla parte hartzen nabarmendu du, presentzialki zein online —halako bi talde daude martxan—.
Bi hamarkada lanean
Hogei urte beteko ditu aurten Mintzalaguna programak, eta horri ere garrantzia eman dio Alfonsok; bi hamarkada daramate euskaraz mintzatzeko espazioak eta aukerak eskaintzen, euskalduntze prozesuan, zein euskaraz bizitzeko hautua egin duten herritar ugariren bidaide izaten.
Alfonsok programan parte hartzera deitu ditu euskararen aldeko urrats bat gehiago egin nahi dutenak. Horretarako mintzalaguna@lauhaizetara.eus postara idatzi, 679 22 85 39 telefono zenbakira deitu, edota labur.eus/lauhaizetara online helbidean eman dezakete izena.
