[Galeria] San Pedro morez jantzi dute, emakumeen borrokak omentzeko
Dantza, bertsoak eta ospakizuna ez ezik, barruti guztietako emakumeen borroken testigantzak ere jaso dituzte herriko frontoian.
Barruti bakoitzeko bi emakume igo zituen oholtzara Pasaiako Mugimendu Feministak. 
Joan den igande goizean Pasaiako emakumeek San Pedroko plaza ospakizun, omenaldi eta aldarriz josi zuten. Bertso, dantza eta loreek eguna apaindu zuten, baina memoria ekitaldiak ez zituen ahanzturan utzi udalerriko emakumeen borrokak, eta ezta Koronabirusak eragindako etxealdiak areagotutako zaurgarritasuna ere.
Barruti bakoitzeko bi emakumek oholtza hartu zuten banan-banan, bakoitzaren borroka anitz bezain komunak -emakume izate hutsak areagotutakoak- hitz gutxitan jaso ondoren, bertaratutakoen txalo artean hartu zituztelarik. Haiek ere izan zuten hitza hartzeko tartea, eta bik egin zuten.
Eider Perezek bertsoa eskaini zien, elkartasuna hizpide, eta Pasaiako emakume gazteek aurreskua dantzatu ondoren lore sorta bana eman zieten oholtzakoei. Etxekoen zaintza, gaixotasuna, enpresa burutza, amatasuna, zailtasun ekonomikoak, bakardadea, hezkuntza… Orotarikoak dira egun batez Pasaiako emakumeen ordezkari izan zirenen historiak, eta horiek omentzeko molde, loreak.
Ekitaldi horrekin Pasaiako Mugimendu Feministak ateak ireki zizkion datozen egunetan Emakumeen Nazioarteko Eguna aldarrikatzeko antolatu dituen ekintzei. Horien artean, gogora ekarri zuten bereziki garrantzizkoa dela aurten, aurrekaririk gabeko egoera honetan, emakumeak martxoaren 8an kalera ateratzea.
