Eskualdea zeharkatu du LABek zaintza lanak aitortzeko
9:30ean Pasai Donibanen bildu dira, gero Oarsoaldea zeharkatu eta 12:00etan Errenteriako udaletxearen aurrean egindako elkarretaratzearekin amaitzeko.
Errenteriako udaletxearen aurrean egindako elkarretaratzearekin eman diote amaiera goizeko ekintza sortari. 
LAB sindikatuak zaintza lanak aitor daitezen eskatzeko eta zerbitzu sozialen sistema eta kudeaketa publiko, unibertsal, doako eta kalitatezkoaren berma dadin dinamika abiarazi du. Horren baitan, greba eguna deitu dute hilaren 4rako; ostegunekoa EAEko gizarte zerbitzuen sektoreko bigarren greba deialdia izango da, urtarrilaren 26ean egindakoa izanik aurrekari.
LABek bideari ekin dio gaur 9:30ean Pasai Donibanetik abiatuta. Barruti hartan elkartu dira autoak, ordu erdi beranduago Pasaiako Udalaren aurrean bildu eta aldarrikapen idatziaren erregistroa eginez. Auto karabana 10:30ean hasi da eskualdea zeharkatzen, herritarren gaiaren berri emateko, eta 12:00etan eman diote amaiera ekintza sortari Errenteriako udaletxearen aurrean agerraldia eginez.
Sindikatuak interpelazio zuzena egin die bi udaletxeei, kudeaketa publikorako urratsak eman ditzaten eskatuz. Eguna aprobetxatu dute gizarte-zerbitzuen egoera salatzeko: “Zerbitzuen kalitateari irabaziak gailentzen zaizkio, langileen baldintza eskasak oinarri. Langile nahikorik ez izatea dakar horrek, baita prebentzio neurri egokirik eta konpentsazio nahikorik ez izatea ere”.
Nabarmendu dute COVID-19ak agerian utzi dituela bi egia: gizarte zerbitzuak ezinbesteko direla bizitzeko, eta zaintza lanen sistemaren ahuleziak ez direla aintzat hartzen, “gutxi batzuen negozioa baitute oinarri. erabiltzaileen osasunaren eta langileen baldintza txarren kontura”.
Sindikatuak argi dauka testuinguru honek inflexio puntua behar duela izan eredu berri bateranzko bidean. Gauzak horrela, EAEko gizarte zerbitzuetako langileei dei egin diete euren udalerrian mobiliza daitezen hilaren 4ean. Eskaera zehatzak hemen irakur daitezke.
