[Galeria] Zahartzaro duina, eskubidea delako
Pentsio, zahartzaro eta bizitza duinen aldeko aldarria zabaldu zuen herriko kaleetan atzo Duintasuna Jubilatu eta pentsiodunen elkarteak.
Duintasunaren protesta atzo. Argazkia: DUINTASUNA Pentsio, zahartzaro eta bizitza duinen aldeko aldarria zabaldu zuen herriko kaleetan atzo Duintasuna Jubilatu eta pentsiodunen elkarteak. Atzo, beraien jardunean berria ez bada ere, genero arrakalarekin amaitzea eskatuko zuten pentsiodunen mugimenduak; soldatetan bezala, pentsioetan ere gizon eta emakumeen arteko pitzadura hori nabarmena delako.
Emakume pentsiodunen artetik, heren batek soilik du bere lan-bizitzari lotutako pentsioa; gainontzekoek alarguntza pentsioa jasotzen dute, eta bataz beste, gizonek jasotzen dutena baino %36 baxuagoa da. Toledoko Ituna ere izan zuten hizpide; izan ere, egindako gomendioek emakumeen pentsiodunen, edota alargunen egoera okertzea ekarriko du Duintasunaren esanetan: “Pentsio baxuenak jasotzen dituztenen artetik gehienak emakumeak dira, eta genero arrakalari aurre egiteko kotizazio gabeko pentsioen sistema berrikustea eskatzen dugu hilean 402 eurorekin ez delako nahikoa bizitzeko; berdin alarguntza pentsioarekin, horren bataz bestekoa hilean 700 euro dira”.
Horren irtenbidea, pentsio sistema publikoa blindatzea, eta 1.080 euroko gutxieneko pentsioak bermatzea. Oraina dago jokoan, baita etorkizuna ere, egun baldintza prekarioetan ari diren langileak, biharko pentsiodunak izango direlako.
Argazkiak Duintasuna elkarteak egindakoak dira.
