Lezoko kaleetan emakumeen izen gehiago nahi ditu PSE-EEk
Lezoko PSE-EEk egin duen azterketa lanaren arabera, herriko 48 kaleetatik bakarrak darama emakume baten izena: Agustina Lizarazu kaleak.
Agustina Lizarazu kalea. Irudia: Google Maps. Lezoko PSE-EEren udal taldeak mozioa aurkeztu du udalean, Martxoaren 8aren harira. Bertan jasota dago Altzate eta Olatzar eremuetan egingo diren garapen urbanistikoetatik sortuko diren kale berrien izenetan genero berdintasun printzipioa ezartzea.
Mozioa, Lezoko kaleen, plazen eta eraikinen izenen azterketa egin ondoren landu du PSE-EEk. “Emakumeen izena duten kale oso gutxi daude herrian, desoreka oso handia da”, esan dute. Ikerketa horren arabera, Lezok dituen 48 kaleetatik, bakarrak du emakume izena, Agustina Lizarazuren omenez jarritakoa hain zuzen. Hala, Altzaten eta Olatzarren sortuko diren kale eta espazioei emakumeen izenak ezartzea aukera “paregabea” dela azaldu du sozialisten eledun Jose Angel Sanchezek. Hala, arrazoi bategatik edo besteagatik nabarmendu diren emakumeei kale izendegian aitortza egitea beharrezkotzat dute sozialistek, “emakumeen toponimoen eskasia dago, emakumeen jarduna ikusezina izan delako historian zehar”.
PSE-EE sinetsita dago genero berdintasunaren bidean udalak ekintzaile izan behar duela. “Ekintza horietako bat da kale izendegian presentzia orekatua izatea emakumeen eta gizonen izenen artean kaleetan, espazio publikoetan, eta eraikin publikoetan”. Gainera, kaleetan eta espazio publikoetan emakumeen izenak jartzen badira, haien biografiaren berri ematen duten plakak jartzeko eskaera egin dute.
