[Bideoa eta galeria] "Sistema arrakalatuko duen lurrikara sortzen ari gara"
Mobilizazio jendetsua egin dute gaur eguerdian Oarsoaldeko ikasleek. Martxoaren 8aren harira zer aldarrikatu eta borrokatu dagoela esan dute ozen Errenteria-Orereta, Lezo, Pasaia eta Oiartzungo neska gazteek, eta mezu argia helarazi dute: kolpe bakoitzeko, sistema arrakalatuko duen lurrikara sortzen ari direla.
Loraldi betean da mugimendu feminista, baita neska gazteen borroka ere. Mobilizazio jendetsua egin dute gaur eguerdian Oarsoaldeko ikasleek. Martxoaren 8aren harira zer aldarrikatu eta borrokatu dagoela esan dute ozen Errenteria-Orereta, Lezo, Pasaia eta Oiartzungo neska gazteek, eta mezu argia helarazi dute: kolpe bakoitzeko, sistema arrakalatuko duen lurrikara sortzen ari direla. 12:00etan abiatu da manifestazioa Herriko Plazatik, eta herriko erdialdeko kaleak zeharkatuta, hasierako puntu berean amaitu da. Irakurketa sakona neska gazteek egungo egoeraz eta arrakalatu behar den sistema heteropatriarkalaz egin dutena; prest daude, eta prestatuta datoz, oso, egitekoak eta horiek lortzeko bideak ongi zehaztuta; lanerako eta borrokarako prest.
Azken urteotan mugimendu feministak izandako potentzialitatea agerikoa dela esan dute mobilizazio amaieran, “kontzientziak astintzeko gai izan gara, espazioak hartu eta eragiteko ahalmena izan dugu eta kapitalaren aurrean, bizitzak erdigunean jartzeko aldarria mahai gaineratu dugu”. Aurreko urteetako grebetan herrietako kaleak emakumeez gainezka egin zutela ere ekarri dute gogora, eta emakumeen gain jartzen diren zaintza lan horiek gabe sistema erori egingo dela frogatu dela nabarmendu.
Neska gazteek ere, borroka feministan dagokien protagonismoa hartu dute, argi utzi dute gaurko mobilizazioarekin hala dela, eta horrek Euskal herriko neska gazte taldeen loraldia ekarri duela argi esan dute. Goraka doan mugimendu feministak, baina, errealitate gordin batekin topo egin duela nabarmendu dute, mundu osoan zabaldu den krisi anizkoitza, eta horrek “biolentzian oinarritzen den” sistema heteropatriarkal, kapitalista eta arrazistaren aurpegirik basatiena erakutsi duela. COVID-19aren pandemiak gainera, sistemaren hauskortasuna eta horrekin, jokoan dagoena bizitza dela erakutsi duen zalantzarik ez dute.
Horren adibideak ere eman dituzte, eta besteak beste, modu birtualean eskainitako ikaskuntza prozesuak ez duela kalitatezko hezkuntza bermatzen, praktikaldiak lortzeko zailtasunak, unibertsitate eta ikastetxe eremuetan antolatzeko mugak gehitu izana, edota neska ikasleek pairatzen zituzten zapalkuntzak areagotu izana aipatu dituzte.
Kapitala lehenetsi dela pandemia egoeran beste behin ere gogor salatu dute: “Krisialdiak eragin zuzena izan du enpleguaren esparruan, bereziki zaintzari dagozkion eremu feminizatuetan, kolpatuenak arlo hauetan diharduten eta egoera irregularrean dauden emakume langileak izan direlarik. Aitorpen gabekoa eta esplotatua den lan hau funtsezkoa da, horregatik aldarrikatzen dugu duina eta kalitatezkoa behar duela izan. Ezinbestekoak izanik, minimoetan daudela salatuko dugu”.
Transexualen eskubideez ere mintzo dira gaurko mobilizazioan, eta aurrera pausuak egiten ari badira ere, “feminismo erradikalaren” izenean trans legearen aurka azaldutako jarrera zein mezuak ezin dituztela ahaztu esan dute, “mezu baztertzaile eta zapaltzaileen aurrean matxinatuko gara, gorputz eta identitate disidenteen borroka da gurea”. Horren harira, trans identitate askerik gabeko Euskal herririk ez dutela onartuko esan dute, eta eraso transfobo eta LGTBIfobo oro salatuko dutela.
Elkar zaintza eta komunitatea, erdigunera
Hezkuntza ez dela eremu isolatua esan dute, eta sistemaren barruko logikak eremu horretan ere errepikatzen direla “etengabe”, “kaleak, ikastetxeak eta unibertsitateak hartzen jarrituko dugu; bereziki gazteoi egozten diguten arduragabekeriaren aurrean, dagokigun arduraz jokatzen jarraituz”.
Elkar zaintza eta komunitatea erdigunean jartzea da neska gazteen ustetan gakoa, beraien arteko elkartasun sareak ehuntzea inoiz baino garrantzitsua omen da, “hori da elkartasuna eta zaintza. Eta horretarako, ezinbestekoa da mugimendu feminista indartsu eta anitza, inoiz baino antolatuago, saretuago eta kritikoago mentenduko dena”. Argi dutelako ez dela erronka txikia bizitzak sostengatzeko ardurak kolektibizatzea eta botere harremanak errotik aldatzea, “hori dela eta, gero eta gehiago izan behar dugu mugimendu feministaren parte aktibo garen emakumeok, eta horrekin batera neska gazteok. Guk ere baduguz er hausnartu eta aldatu, gure pribilejioak, gure arteko arrazakeriari begiratu eta deseraiki, aliantza sareak sortuz”.
Horren harira deia neska gazteei, inoiz baino gehiago antolatzeko eta borroka feministara batzeko, “Euskal Herrian eta Euskal Herritik dena aldatzeko. Ardura kolektiboz jokatzea, gure jardun feminista mantentzea eta borrokatzen jarraitzea delako, elkar zainduz, saretuz, eta gure artean konspiratzeko espaizoak sortuz. Sistema bortitz honen aurrean, inoiz baino beharrezkoagoa den honetan kalean topatuko dugu elkar”.
Egiteko argia, mezu sakona, eta lanerako gogoz dator neska gazteen belaunaldi berria, lekukoa eta eragile aktibo izateko prest, “Euskal herri antiarrazista, antikapitalista eta feminista eraikitzera gatoz”.
Eguerdiko mobilizazioaz gain, arratsaldean Oreretako Mugimendu Feministak 19:00etan mobilizazioa deitu duela ekarri dute gogora azkenik, eta bertaratzera deitu dituzte neska gazte guztiak.
