[Bideoa eta galeria] Sistemari arrakalak sortzera doaz
Euskal Herri feminista, antikapitalista, eta antiarrazista eraikitzera doaz; bidea hasi dute, eta ez du atzera bueltarik.
Manifestazio jendetsua egin dute Lezon. Martxoak 8 COVID-19aren pandemiak baldintzatuta heldu da, baina kalera atera dira emakumeak beren aldarriak inoiz baino ozenago zabaltzera eta sistemari arrakalak sortzeko konpromisoa hartuta. Lezon ere hala atera dira, hamarnaka eta hamarnaka, herria aldarriz betetzera. Bidea musikak lagunduta egin dute.
20:00etan abiatu da manifestazioa Gurutze Santuaren plazatik, ilaratan antolatuta, osasun eta segurtasun neurri denak zorrotz beteta. Pankartaren atzean, Jaione Jauregi euskal preso lezoarraren argazkia. Herri osoa zeharkatuta, Saldise plazan amaitu da protesta eta bertan ekitaldi polita eskaini dute, irakurketaren ostean, dantza saioa eta more koloreko bengalak piztuta amaitu baitute. Azken greba feministatik bi urte pasa direla ekarri dute gogora, “bi urte, planto egin eta bizitzak erdigunera ekartzeko beharra plazaratu genuenetik, eta urtebete pasa da antolatu eta borroka feministara batzeko deia egin genuenetik. Ordutik, COVID-19ak eragindako izurrite testuinguruak, sistema honen dimentsio ezberdinetako krisiak azaleratu ditu; lehertu dena ez baita osasun krisia soilik”.
Gobernuek herritarren osasunaren gainetik kapitala jarri izana gogor salatu dute bildutakoek, “mugak eta kaleak militarizatuta, abusu polizial eta arrazistak, ehunka kide kaleratuak, milaka emakumek lan merkatua utzi behar izan dute zaintza lanengatik. Agerian gelditu da Euskal Herrian bertan erabakiak hartzeko ahalmen eza: indarkeria matxistak ez du etenik izan, eta krisialdiak eragin zuzena izan du eremu feminizatuetan, batez ere egoera irregularrean dauden emakume langileen eremuan”.
Aurtengo Martxoaren 8a inoiz baino gehiago antolatu dutela sistemari arrakalak sortzeko konpromisoa adierazteko asmoz, gaineratu dute, eta pandemia egoerak sortutako mugak gaindituta, kalea salaketarako espazio izatea bilatuko dutela esan.
Feminismoa antolatu eta kolektiboki borrokan jarraitzeko beharra nabarmendu dute, bestalde, sistema kapitalista, heteropatriarkal, arrazista arrakalatzeko, “bizitzak sostengatzeko ardurak kolektibizatzeko eta botere harremanak errotik aldatzeko”.
Egunetik egunera indartzen doaz mugimendu feminista, hori agerian gelditzen ari da azken urteei erreparatuta, eta dena aldatzeko lanean jarraitzeko konpromisoa berretsi dute gaurko mobilizazioan, “gure arteko arrazakeria bistaratu eta landuz, herri eta auzoetan elkartasun sareak ehunduz, borrokarako espazioak zabalduz”, eta lan hori, Euskal Herrian eta Euskal Herritik egingo dutela argi utzi dute.
Euskal Herri feminista, antikapitalista, eta antiarrazista eraikitzera doaz; bidea hasi dute, eta ez du atzera bueltarik.
