Perez eta Inziarte euskal presoen hurbiltzearekin, pozik azaldu da Sare
Halako berriek poztasuna sortzen dutela, baina batez ere, lanean jarraitzera animatzen dituztela aitortu du euskal preso eta iheslarien aldeko dinamikak.
Larri gaixo dauden presoen etxeratzearen aldeko bandera, eta euskal preso eta ihgeslarien etxeratzearen aldekoa. Eider Perez Aristizabal, eta Juan Manuel Inziarte Gallardo euskal presoen hurbiltzearen gaineko balorazioa egin du Sare Herritarrak. Espetxe politikak jada gogorra egiten badu euskal presoek bizi duten egoera, pandemiak are gogorragoa bilakatu du espetxeetako errealitate hori baita iheslariena ere: ” COVID-19ak eragindako krisiarekin are bakanduago daude, eta egoera soziosanitarioa ankerra da”. Hala izanik, gaurkoan pozteko arrazoia baduela esan du Sare Herritarrak, “Eider Perez Algeciraseko Botafuego espetxetik, etxetik 1.100 kilometrora, Zaragozako Zuera espetxera, etxetik 245 kilometrora lekualdatu dute. Bidai luze eta amaiezinaren ondoren, Zueran da”.
Horrez gain, Juan Manuel Inziarte Buto, Salamankako Topas espetxetik, etxetik 490 kilometrora, Kantabriako El Duesora gerturatu dute, etxetik 175 kilometrora.
Zaragoza eta Kantabria ez direla Euskal Herria, baina familiarengandik eta lagunengandik gertuago direla bi euskal presoak nabarmendu du Sarek, “Salbuespen espetxe politikaren eraginez Perezek eta Inziartek, familiak eta lagunek pairatzen duten sakabanaketa eta urruntzearekin bukatzeko pausu bat da, etxetik gertuago izango ditugu”.
Halako berriek poztasuna sortzen dutela, baina batez ere, lanean jarraitzera animatzen dituztela aitortu du euskal preso eta iheslarien aldeko dinamikak, “gizarte justuago baten alde lan egiteko ilusioa, konponbidean, elkarbizitzan eta bakean oinarritutako etorkizuna lortze aldera lan egiteko ilusioa”.
Errenteria-Oreretako gainontzeko preso eta iheslariak presente izan ditu Sare Herritarrak balorazioa egiteko momentuan, eta eskaera zehatza egin du: “Salbuespen politika bertan behera utzi eta lege arrunta ezartzeko ezartzeko eskatzen dugu. Ezohiko erregimen honek ahalbidetzen duelako euskal preso askori kamuflatutako biziarteko zigorrak ezartzea”. Halaber, adineko eta larri gaixo dauden euskal presoen etxeratzea eskatu du enegarrenez dinamikak, baita urruntze politika amaitzea, eta etxeratze prozesua martxan jartzen duen gradu progresioa ezartzea. “Konponbidea ahalbidetuko duen trantsizio politika behar-beharrezkoa dugu”, erantsi du.
Lortutakoa txalotu du Sarek, eta era berean, herritar guztiak animatu dituzte bidea egiten jarraitzera, “kalean, lantokietan, gure ingurunean… bakea, elkarbizitza eta konponbidea lortzeko”.
