Golak jasotzen hasi dira Bekoerrotako ateak
Munttarpe Eskubaloi Klubak emakumeen hiru talderekin berrekin dio sasoiari. Gizonen taldea ezin izan dute martxan jarri. COVID-19ak taldean eragina izan duela adierazi du Nagore Tolosa presidenteak.
Munttarpe Eskubaloi Klubak berriz ere lehiaketei ekin die, COVID-19ak eragindako geldialdiak eta gero. Berri baikorrak eta eskasagoak dituzte, ordea. Onak dira emakumeen kategorian bi talde gehiago dituztela. Txarra da gizonena desagertu egin dela hainbat arrazoi medio; azken hori hurrengo sasoian berriz ere martxan izan dadin lanean ari da zuzendaritza batzordea.
Emakumeetan, azken urteetan bezala, emakumeen Senior taldea Gipuzkoako Lehen Mailan lehian hasi da. Eta bi talde berri erantsi dizkiote horri, harrobikoak: Gazte eta Kadete mailetakoak. «Errenteria-Oreretako Ereintza taldearekin akordioa egin dugu. Utzitako jokalariei esker osatu ditugu harrobiko bi talde horiek. Gure intentzioa da eskualdean eskubaloia zabaltzea. Lezon pista ona dugu, baliabideak ditugu, eta haien jokalariei irtenbide bat emateko aukera ona izan da. Azken batean, Lezo Errenteria ondoan dago», zehaztu du Nagore Tolosa Munttarpeko presidenteak. Hurrengo urtean taldeen kopurua handitzeko nahia adierazi du.
Izan ere, emakumeen kategorietan gehienbat, Senior Mailara jauzia egiteko garaian jokalari askok atzera egiten dute, «unibertsitateko ikasketengatik, edo auskalo zergatik, neska jokalari askok jarduna eteten dute Gazte Maila bukatzean». Hori iraultzeko bidea izan daiteke hasi berri dutena.
Koronabirusaren eragina
COVID-19ak Munttarperen jardunean ere eragina izan duela ziurtatu du Tolosak. Sasoi hasieran (irailean) zituzten hainbat jokalarik taldea utzi dute (gizonen kategoriakoak batik bat), entrenamenduetan ez dute jarraipenik izan, eta entrenatzeko aukera izan denean, talde txikietan ibili dira. Txantxetan esan du presidenteak lau aurredenboraldiko sasoia dela abian dena, birusagatik hainbat geldialdi egin behar izan dituztelako. «Horrek desmotibazioa ekarri du. Horri lana edo ikasketak gehitzen bazaizkio, zaila izan da egoera».
Munttarpek prest dituen hiru taldeak martxan dira jada. Joan den asteburuan izan ziren lehenegoz denak kantxan. Baina estu dator egutegia: Senior taldeak, adibidez, apirilaren 28a baino lehen hamar partida jokatu behar ditu. 5
