Kontsumorako aholkuak eman ditu Oarsoaldeko Kontsumo Bulegoak
Kontsumitzaileen Eskubideen Mundu Egunaren baitan -hilak 15-, erosleen eskubide eta betebeharrak zehazteko zerrenda bat prestatu dute.
Hilaren 15a Kontsumitzaileen Eskubideen Mundu Eguna da, eta Oarsoaldeko Kontsumo Bulegoak gogora ekarri du garrantzitsua dela herritarren kontsumo ekintzak arduratsuak eta kontzienteak izan daitezen. Horretan laguntzeko, erosleek dituzten eskubideei buruzko aurretiko informazioa jaso dezaten aholkatu dute, eta baita arduraz jokatzea ere. Beste hainbat argibiderekin zerrenda osatu dute:
- Kontsumitzeko erabakia hartu aurretik hausnartzea; benetan beharrezkoa den baloratzea.
- Aldez aurretik informatzea, arazoak saihesteko.
- Kontratua edo kontratazioa egiaztatzen duen egiaztagiria eskatzea eta gordetzea. Kontratuarekin lotutako publizitatea ere gorde egin behar da.
- Fakturak eskatu, egiaztatu eta gordetzea.
- Noizbehinka kontuak berrikustea, dena ondo dagoela egiaztatzeko (batez ere aldaketaren bat egin bada azken aldian).
- Internet bidezko erosketetan, egiaztatu enpresaren kokapena, harremanetarako modua, erosteko eta itzultzeko baldintzak.
- Kontuz Instagramen edo beste sare sozialetan agertzen diren iragarkiekin edo eskaintzekin, Whatsapp bidezko salmenta egiten duten ustezko enpresak eta ordainketa gisa transferentzia bat eskatzen dutenak.
- Arazorik izanez gero, momentuan erreklamatu, denbora pasatzen utzi gabe. Telefonoz egiten badugu, gorabehera-zenbakia eskatu behar da.
- Modu iraunkorrean kontsumitzea, ahal den neurrian, ingurumeneko eragina txikiagotzen saiatuz eta tokiko merkataritza bultzatuz.
- Murriztu. Benetan beharrezkoa dena kontsumitzea.
- Bilgarri gehiegi dituzten produktuak saihestea.
- Konpondu. Ez dago hondatu den zerbait bota beharrik. Konpon daiteke.
- Berreskuratu. Konpondu ezin bada, agian berreskuratu eta zatiren bat berriro erabili ahal izango da.
- Berrerabili.
- Birziklatu.
