Ustez mozkortuta zegoen gidari batek oinezko bat harrapatu du Antxon
Gizonezko batek oinezko bat harrapatu du zebrabide batean, atzeraka zihoala. Gidaria "ez zen gai izan alkoholemia proba behar bezala egiteko".
Udaltzaingoak atestatu bat ireki du Antxon trafikoaren segurtasunaren aurkako delituagatik. 
Pasaiako Udaltzaingoak azken egunotan udalerrian egindako esku hartzeen berri eman du. Horien artean, bi atestatu egin dituzte, lehena Trintxerpeko supermerkatu batean lapurreta egiteagatik, eta trafikoaren segurtasunaren aurkako delitu batengatik bigarrena.
Azken horri dagokionez, gizonezko batek Antxoko zebrabide batean oinezko bat harrapatu zuela iragarri dute, kotxea atzeraka zihoala. Udaltzaingoaren hitzetan, gidaria “ez zen gai izan alkoholemia proba behar bezala egiteko, eta alkoholaren eraginpean zegoelako zantzu argiak zituen”.
Aipatutakoaz gain, beste hamabost zigor ezarri dituzte udalerriaren zaintzaren arduradunek COVID-19aren baitan ezarritako neurriak urratzeagatik. Hamar gazte hauteman zituzten San Pedron etxeratze ordutik kanpo, eta beste bost zigor proposamen egin zituzten asteburuan zehar, hala nola, maskara ez erabiltzeagatik edota, establezimendu baten kasuan, baimendutako ordutegitik kanpo irekita egotea egotzita.
