Aldakoeneako haur eskola auzo-udal izango da
Kultur ekipamendua egitea Beraungo Aldakoenea kaleko haur eskolan aurreikusia zuen udalak. Hasierako proiektu hori norabide aldaketarekin dator orain; eraikina auzo udal bihurtuko da, eta bertan Zu! Zure Udala arreta zerbitzua eta Gizarte Zerbitzuak kokatuko ditu udalak.
Eñaut Gracia eta Aizpea Otaegi Aldakoenean goiko aldeko auzoei begirako udal ekipamendua hartuko duen eraikinaren aurrean. Kultur ekipamendua egitea Beraungo Aldakoenea kaleko haur eskolan aurreikusia zuen udalak. Hasierako proiektu hori norabide aldaketarekin dator orain; eraikina auzo udal bihurtuko da, eta bertan Zu! Zure Udala arreta zerbitzua eta Gizarte Zerbitzuak kokatuko ditu udalak Beraungo auzotarrez gain, Kaputxinoetakoek, Alabergakoek eta Galtzarabordako goialdekoek eskurago izan ditzaten udal zerbitzu horiek. Udalak zein gizarte zerbitzuek eskaintzen dituzten tramite eta eskaera guztiak bertatik egiteko aukera izango dute, inguru horretan bizi den Errenteria-Oreretako biztanleriaren zati handi bati Erdigunera joan behar izan gabe zerbitzua emateko.
Aizpea Otaegi alkateak eta Eñaut Gracia Gizarte Zerbitzuetako Saileko eta Modernizazioa, Informazioaren Gizartea eta Herritarren Parte-hartzea azpisaileko zinegotzi ordezkariak egin dute gaur agerraldia, Aldakoeneako eraikinaren aurrean. COVID-19aren pandemiak zer pentsatua eman diela esan du Otaegik udal ekipamenduaren hasierako ekipamenduaren izaeraren aldaketa azaltzeko unean: “Zaintzak duen garrantziaren inguruan, baina baita udal zerbitzuak eta udala bera ere herritarrengandik ahalik eta hurbilen egoteak daukan garrantziaz zerbait ikasarazi digu. Pentsatzen dugu etorkizuneko erronkei erantzuteko garrantzitsua dela udal zerbitzu horiek dezentralizatzea”.
Funtsean bi udal zerbitzu horiek eskainiko ditu ekipamendu berriak, baina beste dotazio batzuk ere izango ditu; hemeroteka eta auzo areto txikia atonduko dituzte bertan auzotarrek formatu txikiko ekitaldiak antolatzeko aukera izan dezaten. Zerbitzuetarako administrazioko langileez gain, sei gizarte langile eta koordinatzaile bat arituko dira zerbitzu berrian.
Eraikinaren obraren egoeraren berri ere eman du Otaegik. Horren harira, duela bi urte esleitu zitzaiola obra hori enpresa bati ekarri du gogora, “eta ezusteko hainbat eduki ditugu. Batetik tentsio ertaineko kable bat planoetan jasota ez zegoena azaldu zen atariaren aurreko aldean eta horrek obnra eten beharra ekarri zuen Iberdrolak berari zegozkion lanak egin zitzan kablea lekuz aldatzeko”. Hori konponduta eta obrari berrekin behar ziotenean, eraikina barrutik kutsatuta egon zitekeen susmoa, “amiantoa egon zitekeela ikusi zen eta amianto hori kentzeko esku hartze bat ere egin zen. Horrek guztiak obra bi urtez atzeratzea ekarri du”.
Esleitua izan zen enpresa duela bi urte obrak egiteko, orduko baldintzetan jarraitzeko asmorik ez duela jakinarazi diela esan du bestalde, alkateak. Hori horrela, eta bi aldeek adostuta, kontratua bertan behera utzi eta berriro lizitaziora aterako du udalak, “urrats horiek lehenbailehen egin nahi ditugu, irailean bertan obrak berrartzeko moduan izan gaitezen”.
Gizarte Zerbitzuetan gaur egun artatzen diren txostenen %40 Errenteria-Oreretako auzo horietako goiko aldekoak direla zehaztu du bere aldetik Graciak.
Gaurko agerraldian eman duten informazio guztia gainontzeko alderdi politikoekin partekatu dutela ere jakinarazi du Otaegik.
Udal Ekipamenduaren izaeraren aldaketaren gaineko informazioa izan dutela bizilagunek zehaztu du Graciak. Horretarako Bernar Lemos Auzoetako zinegotzia izan da beraiekin. Beraungo Auzo Elkarteak oso positibotzat eman duela proiektua gaineratu du, “egin genituen asebetetze inkestetan azaldu zen herritarren aldetik kezka edo nahi hori, beharrezkoa jotzen zutela zerbitzuak hurbiltzea”. Jubilatuen elkartearekin berriz, gaur bertan izan direla zehaztu du Graciak, “900 bazkide dira eta beraiek ere pozik azaldu dira”.
Orain garrantzitsua lizitazio prozesua azkar joatea dela zehaztu du azkenik Otaegik, “obrak irailean berrartzeko aukera izan dezagun. Birgaitze prozesuak urtebete eraman dezake behin esleipena egin eta lanak berriro hasita”. Udalak 100.000 euro inbertituko ditu udal ekipamendu berri horretan.
