Poesia lehiaketa jarri dute abian Pasaiako liburutegiek
Lanak euskaraz nahiz gazteleraz aurkeztu ahal izango dira, ekainaren 18ra arte. Hizkuntza bakoitzeko bina sari banatuko dituzte.
Pasaiako liburutegiek Xabier Portugal-Pasaia hiria olerki lehiaketa jarri dute martxan. 
Hilaren 21ean ospatzen den Poesiaren Nazioarteko Egunaren magalpean, Pasaiako liburutegiek Xabier Portugal-Pasaia hiria olerki lehiaketa jarri dute martxan; lanak euskaraz nahiz gazteleraz aurkez daitezke ekainaren 18ra arte, eta honakoak dira hartarako zehaztu dituzten baldintzak:
- Hamasei urte beteta eduki beharko dituzte parte hartzaileek, gutxienez.
- Aurretik sarituak izan ez diren obra original eta argitaragabeak aurkeztu behar dira.
- Lanak euskaraz edo gazteleraz aurkez daitezke.
- Gaia librea da.
- Egile bakoitzak nahi adina olerki aurkez ditzake, baina gutxienez 200 lerro izan beharko dituzte.
Aurkeztu beharrekoak:
- Egileak lanaren hiru kopia aurkeztu beharko ditu, ordenagailuz, biko tartearekin eta alde batean soilik idatzita.
- Azalean lanaren izenburua zehaztu beharko da eta ez du sinadurarik izan behar, ezta egilearen beste inolako zehaztasunik ere.
- Horrekin batera gutun azal itxi bat bidali beharko da, eta kanpoaldean lanaren goiburua eta hizkuntza -euskara edo gaztelera- zehaztu beharko dira.
- Gutunaren barnean egilearen izen-deiturak, helbidea, adina, telefonoa eta posta elektronikoa (nahi izanez gero) zehaztuko dira.
Bi sari banatuko dituzte -euskarazko nahiz gaztelerazko atalean- 1.200 eurokoa lehenarentzat eta 600 eurokoa bigarren postuan gelditzen denarentzat. Lanak, arestian aipatu bezala, ekainaren 18a aurretik bidali beharko dira, honako helbide honetara:
TRINTXERPEKO UDAL LIBURUTEGIA
Euskadi etorbidea, z/g
20110 PASAIA (Gipuzkoa)
