Salaketa kopuruak gora egin du 2020ean, aurreko urtearekin alderatuz
319tik 37 Antxon denbora tarte zehatz batean izandako salaketak dira. Udaltzaingoaren oinezko patruilei eta argiztapenari lehentasuna emango dio udalak.
Alkateak lehentasuna emango die aurten Udaltzaingoaren patruilei. 
Udalerrian 2020ean zehar izandako salaketek apur bat gora egin dute aurreko urtekoekin alderatuz: zifra 319ra igo da 302tik. Alkateak azaldu nahi izan du, orobat, denuntzia kopurua egonkortu egin dela Pasaian, zenbatutakoen artean 37 Antxon denbora tarte zehatz batean izandako “gertakari puntualei” baitagozkie. Zauritudun istripuak murriztu dira: 2019an 22 pertsona zauritu zituzten Pasaian, eta 2020an, berriz, 19.
Honakoak dira zifrak, barrutiz barruti:
- Antxo. 87 salaketa inguru, gehienak lapurreta edo kalteengatik -horien artean 37 aipatutako denbora tarte zehatz horretan trasteleku eta garajeetan eragindako kalteengatik-.
- Trintxerpe. Kopurua zertxobait igo da, ebasketa eta lapurretak apur bat jaitsi dira, eta kalte-delituak apur bat igo dira. Udalak ez du zifra zehatzik jakinarazi.
- San Pedro. Zertxobait behera egin dute salaketa kopuruek 2019arekin alderatuz: 45 salaketatik 39ra.
- Donibane. 19tik 10era jaitsi da denuntzia kopurua.
Udalburuak adierazi du lehentasuna ematen jarraituko diela aurten Udaltzaingoaren oinezko patruilei eta argiztapen hobekuntzei. Antxon izandako gertakariei dagokienez, argi utzi du Izaskun Gomezek “egoera hori zuzendu” egin dela, horretarako udaltzain gehiago ezarriz, argiztapena hobetuz eta bideo zaintzako kamerak jarriz.
