Hiru mozio aztertuko dituzte Lezoko udalbatzarrean
Hautetsiek gaurko 19:00etan hasiko dute martxoko ohiko osoko bilkura. Hiru mozioez gain, beste sei aztergai izango dituzte herriko hautetsiek.
Gobernu taldeko hainbat kide, artxiboko irudian. Lezoko Udaleko udalbatza osatzen duten hamahiru zinegotziek ohiko osoko bilkura dute gaur. 19:00etan hasiko da, udaletxean. Bederatzi aztergai izango dituzte, horietatik hiru mozioak dira.
Herritarrek ezin izango dute udalbatzarrean egon (beraz, ezin izango dituzte aurkeztutako mozioak defendatu), ezta prentsak ere. COVID-19aren testuinguruan hartutako neurria da hori, HITZAk baieztatu ahal izan duenez.
Mozioetatik lehena herritar talde batek Amazonen ezarpenaren kontra aurkeztu duena da. Jakina da enpresa horrek Oiartzungo Lanbarrenen ezartzeko asmo duela, eta horrek kontrakotasuna eragin du Oarsoaldeko hainbat sektoretan.
Bigarren mozioa Lezoko Badian Bizik aurkeztutakoa da. Portuaren eta bertan dauden enpresen jarduera dute hizpide, eta lau puntutan, jarduera horiekin zorrotz joka dezala eskatuko diote udalari, eta aldi berean, udalak dagokien erakundeei dei egin diezaiela portu eremuan legedia bete dadin, batez ere kutsadurari dagokien arloetan.
Hirugarren mozioa PSE-EEren udal taldeak aurkeztu du. Lezon emakume izena daraman kale bakarra dago, Agustina Lizarazu kalea, alegia. Sozialisten mozioaren helburua da herrian sortuko diren eremu berrietan emakumeak aintzat har daitezela, eta hain izena duten plaza nahiz kaleak ezar daitezela.
Gainerako sei puntuak honakoak dira:
- 2021eko urtarrilaren 28an ohiko izaerarekin egindako bileraren akta onartzea.
- Lezoko Udalaren Bekoerrota Kiroldegia eta Altzate Igerilekuak kirol instalazioak
erabiltzeko araudi berriari onarpena emateko diktamena. - Ordenantza fiskalen aldaketarako diktamena.
- 2020/12/31n ondasunen inbentarioa eguneratzea eta ibilgetuaren balorazioa onartzeko
diktamena. - 2020ko udal aurrekontuaren likidazioa onartzen emandako dekretuaren kontu ematea.
Aurrekontuaren aldaketen kontu ematea. - Galderak eta eskeak.
