Malawiko LGTBIQ+ kolektiboa babesteko GKEak finantziazioa behar du
Bost urteko kartzela zigorra dago ezarrita emakumeentzat, eta hamalaukoa gizonezkoentzat, sexu bereko harremanengatik. Crowdfunding kanpaina abiatu dute.
Saizar Malawira joan zen bertako herritar albinoen bizitza kalitatea hobetzeko boluntario moduan. 
Alaitz Saizar Suarez antxotarra Malawin (Afrika) bizi da irailaz geroztik bertako herritar albinoak zaurgarritasunaz babesteko lanetan, Gobernuz Kanpoko Erakunde batekin. Azken asteotan, ordea, beste borroka bat gehitu zaio haren jardunari: LGTBIQ+ kolektiboari babesa emateko proiektu bat martxan jartzea, eta ez, gainera, motiborik gabe: Malawiko legediak bost urteko kartzela zigorra ezartzen du emakumeentzat, eta hamalau urtekoa gizonezkoentzat sexu bereko pertsonekin harremanak izateagatik.
Testuinguru horretan, legeak berak ez ezik, gizarteak ere ezartzen die zigorra orientazio sexual jakina dutenei, eta hala gertatu zitzaion Emoryri, bere ahizpak etxean zabaldu baitzuen hura lesbiana zela eta kalera bota zuten gurasoek, “gauez, eta nora joan ez zekiela”, Saizarrek azaldu duenez. Amesgaiztoa ez zen hor amaitu: “Lanera itzuli zenean kaleratua zela esan zioten arrazoi berdinagatik. Bakarrik zegoen, bere bikotea [Ekaii] zerbitzu militarra egiten ari da eta ezin du handik atera, eta telefonoa gutxitan erabili dezake”.
Emory eta Ekaiiri, nahiz Malawin etorkizunean antzeko egoerak jasan litzaketenei eskua luzatzeko, Gobernuz Kanpoko Erakunde bat sortzea dute asmo, lehenik eta behin, kasu berdinean daudenei ostatu emateko beste norakoren bat bilatu bitartean. Horrez gain, “laguntza psikologikoa eta juridikoa ere eman nahi diegu, lana lortzen lagundu edota ekintzak antolatu”.
Donazioak, martxan jartzeko
Horretarako baliabide ekonomikoak behar dituzte, eta crowdfunding kanpaina jarri dute abian hartarako, “etxea alokatzeko, altzairuak erosteko, guarda ordaintzeko, webgunea…”, aitortu du antxotarrak. Gero beste finantziazio moduak topatzea dute xede, baina martxan jartzeko bultzada behar dute. Ekarpenak esteka honen bitartez egin daitezke.
