Ostari: "Ez dezala gutako inork itxi beharrik izan erreskatea beranduegi heldu delako"
COVID-19a heldu zela urtebete denean, agerraldia egin du Ostari ostalari eta tabernarien elkarteak gaur eguerdian.
Ostariren agerraldia Pandemia heldu eta urtebetera egindako balorazioan. COVID-19a heldu zela urtebete denean, agerraldia egin du Ostari ostalari eta tabernarien elkarteak gaur eguerdian. Urte luze eta “zailaren” balorazioa egin dute bertara bildu diren ordezkariek. Bide luzea eta konplikatua izaten ari dela esan dute, eta jakin badakitela osasuna izan dela garrantzitsuena eta gaur egun ere hala dela, “horregatik, agintariek markatu diguten guztia egin dugu eta egiten jarraitzen dugu”.
Negozio eta lanpostu galerari, osasunarena gehitu diote, “fisikoa zein psikologikoa, bizi dugun ziurgabetasun egoera honek eta ezarritako neurri arbitrarioek kalte handiak eragin dizkigutelako. Hala ere, hemen jarraitzen dugu egunero borrokatzen, eta pixkanaka argi apur bat ikusten hasi gara”.
Ostalaritzarekin fidatzen jarraitzeko eskatu dute; ostalaritzarik gabe , gizartea desberdina litzatekeela argi dute, “ez orain arte ezagutu dugun bezalakoa”. Horren harira, eskerrak eman dizkiote Errenteria-Oreretako jendeari, “oso gertu sentitu dugulako, eta berotasuna, maitasuna eta laguntza eskaini digulako. Eskerrik asko guztioi. Guregatik. Guztiongatik”.
Pandemia heldu zenetik, urtebetean ostalaritzan izan duen eragina laburbil du dute Ostariko kideek gainera. Hala, lau hilabetez ateak itxita izan direla, eta laguntzak oso eskasak direla nabarmendu dute. Seinalatu izan dituztela ekarri dute gogora eta errudun sentiarazi, beraien ustez, frogatu ez bada ere kutsatzeen kausa nagusia ostalaritza denik. Exijitutako guztira egokitu direla ere esan dute, ordutegiak, aforoak… “eta denok dakigu zer ondorio eragiten dituzten neurri horiek ostalaritzako langileengan”. Zorpetzea, hori da gaurko agerraldian azaldu den beste arloetako bat, izan ere urte osoan ziurgabetasun betean murgilduta lan egin ondoren, egunez egun planifikatuz, zorpetzea beste aukerarik ez dute izan.
Konponbideak jarri dituzte mahai gainean, azkenik. Erreskatea, benetakoa eta azkarra eskatu dute, “ez dezala gutako inork itxi beharrik izan beranduegi delako”. Ordutegi duinak ezartzea da beste eskaeretako bat, ostalaritzaren jarduera garatu ahal izateko. Azken eskaera, berriz, txertatzea, “Eusko Jaurlaritzak pentsatzen badu gu garela errudunak, txertatu gaitzala”.
