Bake epaile titularra eta ordezkoa hautatuko ditu udalak
Interesdunek zinpeko aitorpena aurkeztu beharko dute. Eskaerarik ez badago, Pasaiako udalbatzak aukeratuko ditu bi kargudunak.
Pasaiako Udalak iragarri du udalbatzari dagokiola udalerri honetako bake-epailea (titularra eta ordezkoa) izendatzea. Eskaerak Pasaiako Udalaren Erregistro Nagusian aurkeztuko dira, deialdiaren iragarkia Gipuzkoako Aldizkari Ofizialean argitaratu eta biharamunetik hogei egun balioduneko epean.
Interesdunek zinpeko aitorpena aurkeztu beharko dute, non adieraziko duten deialdian eskatzen diren baldintza guztiak betetzen dituztela, eta legeak xedatutako ezgaitasun eta bateraezintasunik ez dutela.
Halaber, interesdunek hautaketa prozesuari begira egoki iritzitako merituak aurkeztu beharko dituzte, eta baita Curriculum Vitaea ere. Curriculumean bi hizkuntza ofizialetan zer maila duten adieraziko dute, eta hori egiaztatzeko tituluak aurkeztuko dituzte.
Eskaerak aurkezteko epea amaitu ondoren, udalbatzak eskaera aurkeztu dutenen artean bake epaile titularra eta ordezkoa aukeratuko ditu, betiere ezarritako legezko betebeharrak betetzen badituzte. Eskaerarik ez badago, udalbatzak aukeratuko ditu bake epaile titularra eta ordezkoa, prozeduraren baldintza berberen arabera.
