'Errenteria 1845-1903. Manchester txikia' monografikoa aurkeztu dute
Bi urteko lanaren ondorioz, eta hiribilduaren sorreraren 700. urteurrenarekin bat eginez, Errenteria-Orereta hobeto ulertzeko lana aurkeztu dute.
Aurkezpen ekitaldia atzo egin zuten, Merkatuzarren. 
Errenteria 1845-1903. Manchester txikia monografikoa aurkeztu zuten atzo arratsaldean Merkatuzarren. Errenteriako Udalak argitaratu eta Oarso aldizkariko erredakzio batzordeak sustatutako lanak argia ikusiko du hiribilduaren sorreraren 700. urteurreneko itxiera-ekitaldien karietara.
Ekitaldiari Aizpea Otaegi Mitxelena Errenteriako alkateak, eta obraren hitzaurre-egileak, eman zion hasiera. Parte hartu zuten, halaber, Koldo Ordozgoiti Juanenea liburuaren egile eta koordinatzaileak, Cesarea Garbuno protagonista duen emakumeari eskainitako atalaren egileak, Maite Ruiz de Azua Lizasolak, Elixabete Perez Gaztelu bertsolaritzari eskainitako atalaren egileak eta Miguel Angel Barcenilla Lopez historialari eta La pequeña Manchester doktore tesiaren egileak.
Bi urteko lanak Oarsok memoria berreskura dezan du helburu “eta egungo Errenteria-Orereta hobeto ulertu dadin nahi du”. Denera 800 ale banatuko dira, doan, apirilaren 6tik aurrera honako leku hauetan: Udaletxean, Emakumeen Etxean, Udal Liburutegian eta Niessenen (Kultura).
