Ustezko jihadista bat atxilotu dute Pasai Antxon
Gizona zaintzapeko askatasun egoeran zegoen eta aurrez atxilotua izan zen terrorismo delituengatik. Erakartze- eta doktrinatze-lanak egitea leporatu diote.
Ustezko erradikalizazio jihadistako sareko gizona Antxon atxilotu dute. 
Guardia Zibilak ustezko erradikalizazio jihadistako sare bateko kide bat atxilotu du Pasai Antxon, Algeciraseko (Kadiz) Botafuegos espetxean erakartze- eta doktrinatze- lanak egitea egotzita. Atxilotutakoa zaintzapeko askatasun egoeran zegoen gaur-gaurkoz. Espainiako Barne Ministerioak eman du atxiloketaren berri.
Delitu berdina leporatu diote beste gizon bati Kordoban, azken hori espetxean zegoela; biak ala biak aurrez atxilotuak zeuden “terrorismo-delituen egiletza” leporatuta.
Hiru urte atzera
Ikerketa orain dela hiru urte jarri zuen abian Guardia Zibilak Espainiako Barne Ministerioak zabaldu duenez. Algeciraseko (Kadiz) Botafuegos espetxeko langileek Daesh erakundearekin lotura zuzena zuten hainbat pintada atzeman izanagatik. Horiei esker espetxeratuen artean jihadismora erakartzeko eta doktrinatzeko lanetan ari zen talde bat hauteman zuten.
