Udako oporrak programak, aisialdi hezitzailea eskainiko du aurten ere
4-16 urte arteko haur eta gazteei begirako aisialdi hezitzaile eskaintza zabala antolatu du udalak Udako Oporrak izeneko programaren barruan.
Astelehenean zabalduko du udalak Udako Oporrak programan parte hartzeko izena emateko epea. Hilaren 30era arte izango da zabalik izena emateko epea, eta bertan Errenteria-Oreretan erroldatuta dauden haur guztiek izango dute izena emateko aukera, baita herriko ikastetxeetan ikasten dutenek, nahiz eta bertan erroldatuta ez egon.
Epe horretan web orriaren bidez egin daiteke izen ematea. Presentzialki egiteko aukera ere izango da, baina kasu horretan aldez eskatu beharko da hitzordua, eta gazteriaren web orrian eskuratu beharko da inprimakia. Hori beteta eta aurkeztu beharreko dokumentazioa atxikita Zu Zure Udala Zerbitzuan aurkeztu beharko da kasu horretan hilaren 23a arte. Ordutegia, honakoa: astelehenetan 07:30etik 14:00etara; asteazken eta ostiraletan, 07:30etik 15:00etara; eta astearte eta ostegunetan, 07:30etik 19:00etara. Herritarrei gomendatu diete izapide guztiak etxetik egiteko eroso.
Aisialdi hezitzailearen aldeko apustua egiten jarraituko du udalak, hala jakinarazi dute gaur egin duten agerraldian, Maite Gartzia Gazteria zinegotziak, Ibai Narbarte ludoteka, gazteleku eta programaren koordinatzaileak eta Bea Martin Hezkuntza eta Gazteria dinamizatzaileak. Hala, ikasturtean zehar, parekidetasuna, partaidetza, inklusioa eta euskara balioetan eta eskubideetan heztea helburu duten programak garatzen dituztela nabarmendu dute, “udan ere aisialdi hezitzailearen aldeko apustuarekin jarraitzen dugu”. Programa egungo segurtasun neurrietara egokituta egongo da, eta horrek eragina izan duela antolaketan azaldu dute. 2015 eta 2017 urteen artean jaiotako haurrei zuzendutako Txikiak eta 2011 eta 2014 urteen artean jaiotakoei zuzendutako Udalekuak programatan izena eman nahi dutenek ekainaren 24tik uztailaren 21era bitartean egingo diren lau txandetatik batean parte hartu ahal izango dute. Hiru lekuetan eman ahalko dute izena aurten, Erdigunean, Beraunen eta Markolan. Plazak mugatuak dira eta izena emateko ordenaren arabera esleituko dira.
Tarifak honakoak: Txikiak programan 20:75 euro, eta Udalekuak programan, 25,90 euro. Ordainketa maiatzaren 21etik aurrera egin beharko da izen ematea egiteko garaian adierazitako kontu korronte zenbakian.
Bi programen artean 720 plaza eskainiko dira, asteko, 180.
Errenteabentura
2008tik 2010era bitartean jaiotakoentzat aurten Errenteabentura izeneko programa diseinatu dute, eta bertan izena ematen dutenek, goiz eta arratsaldeko jarduerak —09:30etik 13:30era eta 16:00etatik 19:00etara— zein egun osoko txangoak egiteko aukera izango dute.
Programa uztailaren 5etik 16ra izango da, eta parte hartu nahi duen haur bakoitzak astelehenetik ostiralera egingo den txanda bat aukeratu ahal izango du. Bakoitzean 30 plaza eskainiko dituzte. Ekintzaren prezioa, 25,90 eurokoa izango da.
Azken programa, 2005etik 2007ra artean jaiotako gazteei zuzendutakoa da. Gazte horiek astebete igaro ahalko dute Beireko aterpetxean (Nafarroa) uztailaren 5etik 9ra edo 12tik 16ra. Txanda bakoitzeko 18 gaztek parte hartu ahal izango dute, eta prezioa, 103,60 eurokoa izango da.
Azken bi programa horietan parte hartzaileen zerrenda maiatzaren 10ean 10:00etan egingo den zozketa bidez osatuko da, eta ondoren FGAzteriaren webgunean ikusi ahalko da.
Familia ugariek hobariak izango dituzte, baita seme-alaba bat baino gehiago izena ematen duten familiek. Diru sarrera bermatzeko errenta edo Gizarte larraildiko laguntza jasotzen duten familiek ere hobaria izango dute. Beste urteetan bezala, behar bereziak dituzten haurrentzat hezitzaileak kontratatuko dira.
Informazio gehiago Gazteriaren web orrian, posta elektronikoan edota 943 44 96 06 telefono zenbakian jaso daiteke.
