Hezkuntza ibilbide osoa sare publikoan egitera deitu dute
Oarsoaldeko Euskal Eskola Publikoaren aldeko Plataformak sare publikoan matrikulatzera deitu ditu Errenteria-Orereta, Lezo, Oiartzun eta Pasaiako herritarrak.
Hilaren 12an hasiko da haurreskoletan eta batxilergoan aurrematrikula egiteko epea, eta eskaera zehatza egin du horren harira Oarsoaldeko Euskal Eskola Publikoaren aldeko plataformak, “hezkuntza ibilbide osoa, sare publikoan egitera deitu nahi ditugu herritarrak, horretarako aukera baitaukagu Oarsoaldean”.
Etxeko txikienen kasuan, Haurreskolak Partzuergoko langileen aldarrikapenekin bat egiten duela plataformak azaldu dute, “argi dugu, 0-2 etapa haurren hezkuntza ibilbidearen oinarrizko etapa bat dela, garrantzi ikaragarria duena, eta ildo horretan, hezkuntza Sailean integratuta egon behar duela eta doakoa izan behar duela iruditzen zaigu. Guretzat, sare publikoko ibilbideko lehen urratsa dira, hezkuntza proiektu sendoak eskaintzen dituzten eskolak eta beti haurrak erdigunean jarrita lan egiten dutenak, haiek errespetatuz”.
Haurreskolak Partzuergoko eskoletan hilaren 12tik 21era egin ahal izango da aurrematrikula, eskoletan bertan edo online.
Haurren ibilbidearen hasiera bezain garrantzitsua dela amaiera uste du plataformak, “Batxilergoko urteak”. Oarsoaldearen kasuan, eskualde osoko ikasleak Koldo Mitxelena Bigarren Hezkuntzako ikastetxean biltzen direla azaldu dute, “bertan behar duten formakuntza jasotzeaz gain, ikasleek etorkizunari aurre egiteko laguntza eta orientazioa jasotzen dituzte, eta erabakiak hartzeko autonomia garatzen dute”.
batxilergoaren kasuan, matrikula egiteko epea hilaren 12tik 23ra arte izango da zabalik, eta jarraibide guztiak Koldo Mitxelena Bigarren Hezkuntzako ikastetxearen web orrian kontsulta daitezke. Ikastetxea ezagutzeko ate irekien jardunaldiak egingo dituzte, hilaren 14an eta 15ean, eta horretarako, aldez aurretik hitzordua hartzea ezinbestekoa da. Hemen hartu daiteke.
Plataforma Euskal Eskola Publikoaren eskaintzaren gaineko zehaztapenak eman ditu, “ikastetxe publikoek asko dute eskaintzeko, herri eta auzoetako iakstetxeak dira, hurbilekoak, euskara eta euskal kultura ardatz hartuta baina munduari irekita eta desberdinen arteko elkarbizitzan oinarrituta lan egiten dutenak, gaur egungo gizartearen beharrei erantzunez. Gure herriaren kohesiorako ezinbesteko hazia dira gure ikastetxeak”.
Metodologia berritzailea da aipatu duten beste oinarrietako bat, “ikaslea ikaskuntza prozesuaren erdian jartzen du eskola publikoak, errealitatearen aniztasunari erantzunda, inor atzean ez uzteko”. Hezkuntza komunitateei egin die erreferentzia azkenik plataformak, “aberatsak” direla nabarmentzeko, “ikasle, irakasle, langile eta familiek osatuta daude, eta guztien parte hartzea bermatuta dago hainbat organoren bidez”.