Lobato Etxea eraitsi nahi dutela salatu dute
Altzateko eraikuntza egitasmoari lotuta, Lobato Etxea eraisteko arriskua dagoela salatu dute. 22 urte dira etxea okupatu zutenetik.
Lobato Etxean bizi direnek salatu dute desalojo edo husteko arriskuan daudela. Altzateko eremuari lotutako eraikuntza egitasmoarengatik etxea eraitsi dezaketela adierazi dute Lobatokoek: “Eraikitzaileak, etxe agentziak, bankuek eta Errenteriako nahiz Leozoko udalek zementuzko blokez bete nahi dute hirigunean geratzen den espazio berde bakanetako bat, Lobato Etxea ere inolako beharrik gabe eraitsiz”. Okupazio mugimenduaren aurkako “ofentsibaren” beste adibide bat dela adierazi dute, “presio mediatikoa baliabide, etxebizitzaren auziari irteera emateko edozein alternatiba kriminalizatzen dute”.
Idatzia egin dute Lobatoko kideek euren kezkak jendartean zabaltzeko (klikatu hemen osotasunean ikusteko). Horretan azaldu dute Altzate Parkea plataformarekin bat egiten dutela. Zentzu horretan, Altzatekoa Oarsoaldean egin nahi diren “eraikuntza masiboko” proiektuen artetik beste bat dela (Errenteria-Oreretako Arramendikoa eta Beraungoak ere aipatu dituzte), eta “geratzen diren gune berde apurretan” gauzatu nahi dituztela. Alta, gune berde gehiago eskatzeko iniziatibak ez direla kontuan hartu salatu dute: “Jabeek, beren interes ekonomikoetan soilik oinarritutako bideak proposatzen dituzte, ez dute herritarren zein etxearen konponbide errealik aurkitu nahi. Erakundeek ere ez gaituzte babesten eta herriaren bizkarrera mugitzen diren enpresa boteretsu hauen eskuetan uzten gaituzte”.
22 urte dira Lobato Etxea okupatu zutenetik, “gazte talde batek etxebizitzaren auziari aurre egin nahian”. Ordutik, hainbat lagun bizi izan dira bertan, eta ehunka izan dira egin diren jarduerak, “artista zein kolektibo ugarirentzako kabia izan da”.
Lobatotik deia egin diete herritarrei adi egon daitezela egingo diren mobilizazioei.
