Bateletan, ligako azkenak eta Gipuzkoako Txapelketa asteburuan Donibanen
Larunbatean ligako jardunaldia nahiz txapelketarako sailkatze estropadak egingo dituzte. Igandean erabakiko dira herrialdeko liga nahiz txapelketa.
Gipuzkoako batelen sasoia bukatzear da. Asteburuan, larunbat eta igandean, Pasai Donibanek Gipuzkoako Batel Ligako azken bi estropadak (Gipuzkoako Txapelketarako sailkatze proba izango dena aldi berean larunbatekoa) eta Gipuzkoako Txapelketa (igandean) jokatuko dira hurrenez hurren. San Juan-Koxtaperen esku dago bi jardunaldien antolakuntza lana.
Larunbat nahiz igandeko lehiak Navalaldea eta Bizkaia plazaren arteko eremuan jokatuko dira, portuaren barrualdean alegia.
Biharko (larunbata) jardunaldiari dagokionez, 10:30ean hasiko dira lehiak, binakako erlojupeko modalitatean. Orotara, 72 ontzik parte hartuko dute, horietatik 29 Oarsoaldekoak izango direlarik (Hibaika, Trintxerpe-Illunbe, San Juan eta San Pedrokoak). Ligarako puntuak banatuko dira, baina aldi berean igandean egingo den Gipuzkoako Txapelketarako baliagarri izango dira batelek lortutako postuak. Arraun elkarte bakoitzak ontzi bat baino gehiago eraman dezake kategoria bakoitzean larunbateko estropadan, baina igandeko txapelketara klub bakoitzetik bakarra sailka daiteke.
Larunbateko sailkatzea eginda, igandean finalak izango dira. 10:00etan hasiko dira lehiak.
Bai larunbatekoan zein igandekoan zortzi kategoriako arraunlariek parte hartuko dute: Haur Mailako neska eta mutilak; nesken Promesa kategoriakoek; mutilen Kadete Mailakoek; emakume zein gizonen Gazte Mailakoek; eta emakume zein gizonen Senior Mailakoek.
Batelen liga, eta bestelako xehetasun gehiago izateko, joan Gipuzkoako Arraun Federazioaren webgunera.
Ezin da publikorik egon
Pasaiako Udaltzaingoak gogorarazi du, osasun larrialdi egoeragatik, ezin izango dela egon ikuslerik estropadetan. Antolatzaileek, Pasaiako Udaltzaingoaren eta Babes Zibilaren laguntzarekin, sarbideak kontrolatzeko hainbat puntu ezarriko dituzte, bertakoak eta dagokien justifikazioa duten pertsonak soilik sar daitezen lehiaketa-eremuetara, eta dagozkien osasun-irizpideei eutsi ahal izateko.
Araudia betetzen ez duen edonor zigortu ahal izango dutela nabarmen du Udaltzaingoak.
