Duintasuna kalera aterako da astelehenean
Pentsio duinak, gutxienez 1.080 euro bermatzea eskatuko dute asteleheneko protestan, baina agerian jarriko dute KPIa eta pentsioen arteko deskonexioa, baita erretiroa hartu ahal izateko adina atzeratu izana ere.
Duintasunaren joan den hileko protesta. Beldurrak, kezkak eta pandemiak eragindako mugak tartean, jubilatu eta pentsiodunek aldarria kalera aterako dute astelehenean. Madrilgo Gobernuaren eta Toledoko Itunaren egungo zein etorkizuneko pentsioak jaisteko asmoari aurre egingo diote beste behin ere, hori bai gutxieneko segurtasun tartea errespetatuta eta maskarak soinean.
Pentsio duinak, gutxienez 1.080 euro bermatzea eskatuko dute asteleheneko protestan, baina agerian jarriko dute KPIa eta pentsioen arteko deskonexioa, baita erretiroa hartu ahal izateko adina atzeratu izana ere. Aintzat hartutako urte kopuruaren luzapena, eta bizi itxaropena handitu izana zigortzeko erabakia iraunkortasun faktorearen bidez ere salatuko ditu elkarteak. Badaki, horiek guztiak etengabe borrokatu behar dituela, eta kalea dute horretarako agertokia.
Duintasunak argi esan du euren eskubideak eta bizi duten egoera jakinarazteko eta jendartean zabaltzeko bidea dela protesta: “Kontzientziatu egin nahi dugu, adinekook zein arazo ditugun jakinarazi nahi dugu, guk ditugun arazo eta bizi dugun egoera, etorkizunean, gaur egun langile aktibo eta langabetu direnek izango dituztelako”.
Politika publikoetan jarri du fokua Duintasunak. Garrantzi bizikoak dira eurentzat, eta ezinbestekoa dela Europako Karta Sozialak ezarri bezala 1.080 euroko gutxieneko pentsioak bermatzea aldarrikatu dute. Pertsona asko eta asko oinarrizko beharrak aseak ez izatea onartzeko prest ez daude, eta horren aurrean, zahartzaro eta pentsio duinen alde, bizitza duinen alde kalera aterako dira, beste behin ere astelehenean. Hitzordua, beti bezala, 11:00etan egin dute Herriko Plazan, eta herritar guztiak deitu dituzte parte hartzera, “pentsioena, guztion arazoa delako”.
